Версия для слабовидящих
Элькунлэсь 2020 но 2021-2022 аръёслы чаклам бюджетсэ быдэстэм сярысь кат юнматэмын

Элькунлэсь 2020 но 2021-2022 аръёслы чаклам бюджетсэ быдэстэм сярысь кат юнматэмын

29.06.2021
Элькунлэсь 2020 но 2021-2022 аръёслы чаклам бюджетсэ быдэстэм сярысь кат юнматэмын
Туннэ, Кун Кенешлэн куамын куинетӥ сессияз, депутатъёс элькун бюджетэз миым быдэстэм сярысь катӵектосэз юнматӥзы. Солэсь азьвыл сое вань ӧриосын пыр-поч эскеризы.
Коньдон ужпумъёсъя министрлэн Станислав Евдокимовлэн верамезъя, кылем ар коньдон ласянь Удмуртия понна капчи ӧй вал. Табышъёсъя чакланъёсты быдэстыны ӧз луы, кун пунэмлэн быдӟалаез йылӥз, бюджетлэн дефицитэз котькулэсь бадӟым луиз. Мугез – выль коронавируслэсь вӧлмонзэ дугдытон понна кутэм ужрадъёс. Соос экономикалы уно ыштонъёс ваизы. Озьы ке но, уждун тыронъя но калыклы мерлыко юрттэт сётонъя ужпумъёс кулэезъя быдэсъяськизы.
Предприятиослэн ужзы вылын шӧдӥськизы огъя дунневыл кризис но кунгожъёсты ворсан. Соослэн табышъёссы усизы, соин валче выт тыронзы но кулэсмиз, бюджетэ чакламлэсь 29 процентлы ӧжытгес коньдон келязы. Со понна шӧдскымон будӥз федерал юрттэтлэн быдӟалаез. Со 36 миллиард манет пала луиз яке, 2019 арен ӵошатыса, 54 процентлы тросгес.
2020 арын элькун бюджетлэн быдӟалаез 85 миллиард манетлэсь ортчиз. Чакламлэсь со 7 но ӝыны процентлы ӧжытгес. Уже 100 миллиард манетлэсь ятыргес коньдон кутэмын. Дефицитлэн быдӟалаез – ог 15 миллиард манет. Сессиын озьы ик юнматэмын эмстрахованияя улосвыл фондлэн бюджетэз сярысь отчёт.

Возврат к списку