Версия для слабовидящих
Каракулино черкогуртын «Таза лу!» проектлэн форумез ортчиз

Каракулино черкогуртын «Таза лу!» проектлэн форумез ортчиз

12.05.2021
Каракулино черкогуртын «Таза лу!» проектлэн форумез ортчиз
Туннэ Каракулино черкогуртын «Единая Россия» партилэн «Таза лу!» улосвыл проектэзлэн тазалыкез утёнлы сӥзем сизьыметӥ форумез ортчиз. Таӵе ужрадъёслы кутскон туэ южтолэзе сётэмын вал. Ӵектослэн ужпумез - элькунамы тазалыкез возёнъя сӧзнэт кылдытон.
«Таза лу!» форумъёс радъясько шаерысьтымы гурт ёросъёсын. Отын адямиос тазалыксэс эскерыны, улосвыл эмъяськонниосысь ӧнерчиосын кенешыны, тазалыкез юнматон, сое возён, висёнъёслэсь утиськон но тазалыко улон сямъёсын эшъяськон амалъёс сярысь тодыны быгато. Нимысьтыз саклык висъяське коронавирус инфекцилэсь утиськон но соин висемъёслэсь тазалыксэс юнматон ужпумъёслы.
Форумлэн ужаз Кун Кенешлэн Тӧроезлэн Нырысетӥ воштӥсез, тазалыкез утёнъя, демографи но семья политикая ялан ужась ӧрилэн кивалтӥсез Надежда Михайлова, Федераци Кенешысь экономика политикая Комитетлэн кивалтӥсезлэн Нырысетӥ воштӥсез Юрий Фёдоров, «Единая Россия» партилэн Удмуртиысь улосвыл ёзэзлэн Секретарезлэн воштӥсез Олег Гарин, Удмуртиысь тазалыкез утёнъя министрлэн воштӥсез Сергей Стрижнёв, Каракулино ёрослэн Тӧроез Сергей Русинов пыриськизы.
Форум улсын Каракулиноысь культурая ёрос центрын дышетон, эскерон, валэктон ужрадъёс но мастер-классъёс ортчизы. Со сяна, адямиос ёросысь калыклы мерлыко утет сётонъя ёзысь но Пенси фондлэн ёзысьтыз ӧнерчиосын пумиськылыны быгатӥзы.
Ёрос эмъяськонниын клиникая но диагностикая Элькун центрысь гастроэнтеролог, эндокринолог, пульмонолог но кардиолог приём нуизы.
Школаосын нырысетӥ эмъюрттэт сётонъя занятиос ортчизы. Радъямын вал кыскон но мукет урод сямъёслэн кыштлыксы сярысь лекциос.
Нимаз пумиськон ортчиз дышетисьёсын но ёрос эмъяськонниын ужасьёсын. Отын пиналъёслэсь тазалыксэс утён, дышетонэз радъян но нылпиосты визьнодан ужпумъёсты сэрттӥзы-пертчизы.
Арлыдо муртъёс понна Каракулиноын скандинав амалэн ветлонъя ӵошатсконъёс радъяськизы.

Возврат к списку