Гуртлэн араз Удмуртиын нимаз кузёослэсь возёсъёссэс азинтон сярысь кат кылдыны быгатоз

Владимир Варламов кивалтэм улсын 13 толшоре агропром огъетъя, музъем кусыпъёсъя, инкуазез утёнъя но уже кутонъя ялан ужась комиссилэн кенешонэз ортчиз. Депутатъёс нимаз кузёослэсь возёсъёссэс - ЛПХ–осты - азинтон сярысь катлэсь ӵектоссэ эскеризы. Со пудо-бакча вордӥсь муртъёслы поттэм ваньбурзэс интыяны, ужзэс паськытатыны юрттон понна чакламын.
Нимаз адямиослэсь улонзэс умоятэм сяна, катӵектос огъя гурт интывылъёсты но азинтыны луонлык сётоз.
Ужкагаз гуртоослы кун ласянь юрттэт сётонэз чакла. Соин гуртъёсын мултэс ваньбурез басьтонъя пунктъёс, ветеринар службаос, потребкооперативъёс кылдытыны учкемын. Гуртлэн араз таӵе катэз кутон гуртын поттэм ваньбурлэсь ӟечлыксэ ӝутон но асьсэлэсь гуртоослэсь ужзэс капчиятон понна туж ӟеч амал луоз, малпанзэ вераз Владимир Варламов.
Со будэтӥз, ӵектос бордын уж азьланьтӥське. Отчы пыртыны асьсэлэсь ӵектонъёссэс вераны быгато муниципал огазеяськонъёс но.