Калыклы юон ву вуттон ужпумъёсты эскеризы

Агропром огъетъя, музъем кусыпъёсъя, инкуазез утёнъя но сое уже кутонъя ялан ужась комиссиысь депутатъёс калыклы юон ву вуттон ужпумез эскеризы. Кенешон 13 коньывуонэ видеконференция амалэн радъяськиз.
Кызьы вераз элькунысь лэсьтӥськонъя, жилищно-коммунальной возёсъя но энергетикая министрлэсь ужзэ быдэсъясь Ольга Дубовцева, элькунын юнматэмын но быдэсъяське юон вулэсь ӟечлыксэ ӝутонъя улосвыл программа. Со ужа «Чистая вода» федерал проект улсын но учкемын 2019-2024 аръёслы.
Чакламъя, 2024 арлы огъям сӧзнэтъёсысь вылӥ ӟечлыко юон ву басьтӥсь улӥсьёслэн лыдзы 4,54%-ысь 94,3%-озь вуоз.
2021 арысен шаерамы «Чистая вода» ӵектос улсын 7 объект лэсьтыны чакламын. Туэ элькун бюджетын соослы ужкагазъёсты дасян понна 62,8 миллион манет висъямын. Эскерон ужъёс нуисько ини Ижкарысь Люлли микрорайонын, Кез каргуртын, Можга карын, Вотка ёросысь Новый каргуртын, Дэри ёросысь Октябрьский гуртын, Камбарка ёросысь Кама черкогуртын, Балезино каргуртын.
Озьы ик Удмуртиын азьланьтӥське калыклы юон ву вуттонъя программаез быдэсъян. Таиз ӵектос ужа Удмурт Элькунысь жилищно-коммунальной возёсэз азинтон кун программа улсын. Соя кырсь вуэз поттон но чылкытатон ужъёслы элькун коньдэтын 243,7 млн. манет висъямын. Быдэсъясько гурт ёросъёсысь, озьы ик Ижкарысь но Можгалась канализаци сӧзнэтъёсты выльдон но лэсьтон ужъёс.
Комиссилэн кивалтӥсез Владимир Варламов пусйиз, калыклы юон ву вуттон ужпумъёсты чакланзэ Кун Кенеш азьланьтоз.