Приволжск федерал округысь каткылдытъясьёс дунтэк юридик юрттэт сётон ужпумъёсты эскеризы

Кун ласянь дунтэк юридик юрттэт сётон но адямиослэсь эрикрадъёсъя тодон-валанъёссэс будэтон ужпумъёсты эскеризы Приволжск федерал округысь кат кылдытъясьёслэн Ассоциацизылэн кенешоназ. Со Ульяновск карын ортчиз. Кенешонлэн ужаз пыриськиз Удмуртилэн Кун Кенешезлэн Тӧроез Владимир Невоструев.
Пумиськонэз усьтыса, Росси Азьмуртлэн округысь ужоскето муртэз Игорь Комаров пусйиз, калыклэсь катрадлыкъя тодонъёссэ юнматон – тӧрлыклэн одӥгез валтӥсь ужпумез.
Люкаськемъёс Ульяновск улосвылын та ласянь радъям ужлы ӟеч дунъет сётӥзы. Огкылэ вуэмын вал дунтэк юридик юрттэт сётонъя федерал катэ воштонъёс ӵектыны – пенсие потыны вуэм арлыдо муртъёсты дунтэк юридик юрттэт басьтыны быгатӥсь категорие пыртыны. Озьы ик вераськемын калыклэсь катрадлыкъя тодон-валанъёссэ будэтон сярысь федерал программа кылдытыны курыса вазиськыны.
Кенешонын муниципал огазеяськонъёслэсь азинсконъя стратегиоссэс кылдытон ужпумъёсты но эскеризы. Та ласянь федерал катрадлыкын рос-прос валэктонъёс ӧвӧл. Соин валче ёросъёслэн но каръёслэн азинскон программаоссы ӵемысь улосвыл но федерал стратегиосын вожвыл пото. Приволжск федерал округысь каткылдытъясьёс та ужпумез но сэрттыны-пертчыны курыса вазиськон юнматӥзы.