Ужасьёсты целевой амалэн дасян ужпумъёсты эскеризы

Туннэ Кун Кенешлэн Тӧроез Владимир Невоструев тазалыкез утён но дышетон удысъёслы ужасьёсты целевой амалэн дасян ужпумъёслы сӥзем кенешон ортчытӥз. Видеоконференция амалэн ортчем вераськонэ пыриськизы Кун Кенешысь депутатъёс, элькунысь тазалыкез утёнъя министр Георгий Щербак, дышетонъя но наукая министрлэн нырысетӥ воштӥсез Ирина Крохина, Ижкарысь кун эмакадемилэн, Удмурт кун университетлэн, Глазовысь педагогикая кун институтлэн но эмчиосты дасянъя Элькун колледжлэн кивалтӥсьёсыз.
Ижкарысь кун эмакадемилэн ректорез Алексей Шкляев пусйиз, целевой амалэн дышетскисьёсты кутон туэ умой йылпумъяськиз. Нырысетӥ курсын специалитет программаын 438 бюджет интыос сётэмын. Соос пӧлысь 61 процентэз целевой амалэн лыктӥсьёслы висъямын вал. 215 инты Удмурт Элькунысь куронъёслы чакламын. Лечебной но стоматологияя факультетъёсын конкурс кылдӥз. «Педиатрия» удысын 27 инты буш кылиз, соос огъя конкурс улэ сётэмын, ивортӥз Алексей Шкляев.
Элькунысь тазалыкез утёнъя министрлэн Георгий Щербаклэн верамезъя, та арысен дышетскисьёсты целевой интыосы кутон шӧдскымон воштӥськиз. Нырысьсэ целевикъёс кутэмын элькун эмколледже. Кун эмакадемиез йылпумъяны дасяськись егитъёсын огкылъёс гожтисько. Соосъя министерство егит ӧнерчиосты соослы тужгес зол кулэяськись эмъяськонниосы келяны быгатоз.
Кун Кенешлэн Тӧроез Владимир Невоструев пусйиз, шаерамы выль ФАП-ёсты лэсьтон азьланьтӥське шуыса. Соин ӵош отчы ужасьёсты шедьтыны шуг-секытъёс кылдыло.
Кун Кенешлэн Тӧроезлэн Нырысетӥ воштӥсез, тазалыкез утёнъя, демографи но семья политикая ялан ужась ӧрилэн кивалтӥсез Надежда Михайлова вераз, эмколледж ӵапак фельдшеръёсты но шоръёзо эмужасьёсты дася шуыса. Азьланяз соос гуртъёсысь эмъяськонниосын ужаны быгатозы. Туэ колледжысь вань целевой интыосы Удмуртиысь абитуриентъёс кутэмын.
Дышетонъя но наукая министрлэн нырысетӥ воштӥсез Ирина Крохина дышетӥсьёсты дасян ужпумъёс сярысь вераз. Со пусйиз, туннэ дышетсконниосын буш ужан интыос совмещение амалэн ворсасько.
Педагогикая дышетсконниосын ӧнерчиосты целевой амалэн дасянэз тазалыкез утён удысын сямен ик радъяны ӵектӥзы – нимысьтыз дышетсконниосын интые огкылъёс дышетонъя но наукая министерствоен лэсьтыны.
Наукая, дышетонъя, культурая, йӧскалык но егитъёсын ужан политикая но спортъя ялан ужась ӧрилэн кивалтӥсез Татьяна Ишматова дышетӥсьёслы кулэяськонэз трос аръёслы азьпала чакланы куриз.
Кенешонлы йылпумъянъёс лэсьтыса, Владимир Невоструев ужез умоятонъя ӵектонъёсты дасяны но та ужпумез Кун Кенешлэн Президиумаз эскерыны дэмлаз.