Версия для слабовидящих
Дышетон ужъюртъёслэсь выль дышетскон арлы дасьлыксэс эскеризы

Дышетон ужъюртъёслэсь выль дышетскон арлы дасьлыксэс эскеризы

18.08.2020
Туннэ Кун Кенешлэн Президиумез дышетон ужъюртъёсты выль дышетскон арлы дасян ужпумез эскериз, Ивортон лэсьтӥз Удмуртиысь дышетонъя но наукая министрлэн воштӥсез Ирина Крохина.
Туннэ нуналлы дышетсконниослэн огъя дасьлыксы 88,45%. Школа дорозь тодон-валан сётон огазеяськонъёс 93%, школаос – 90%, ватсаса тодон-валан сётӥсь ужъюртъёс – 83%, ӧнер сётӥсь дышетсконниос – 76%, анай-атайтэк кылем пиналъёслы чаклам ужъюртъёс – 80% дасесь.
Кызьы вераз Ирина Крохина, туэ нимысьтыз саклык висъяське Роспотребнадзорлэсь коронавируслэсь вӧлмонзэ алонъя куронъёссэ быдэсъянлы. Озьы котькуд дышетсконниын адямиослэсь нуналлы быдэ температуразэс эскерозы. Пырон дорын трос калык медам люкаськылы шуыса, юртъёслэсь вань ӧсъёссэс усьтылозы. Бадӟым школаослы 163 тепловизор басьтыны чакламын. Котькуд класс нимысьтыз кабинет борды юнматэмын луоз. 500 дышетскисьлэсь ятыр школаосын «уясь» расписание лэсьтозы.
Школаосын 2020 ар пумозь калыко ужрадъёс уз луэ. Соос ортчытъяны лэземын одӥг класс пушкын но кузятэм нуналэн группаосын гинэ. 1 куарусёнэ линейкаос параллельёсъя радъяськозы. Куронъёс пӧлын озьы ик – дышетсконниосысь пырон доры, сиськонние, спортзалэ, химия, физикая но технология кабинетъёсы омырез чылкытатӥсь тӥрлыкез – рециркуляторъёсты – пуктылон. Нылпи садъёсы интыысь интые вошъяны луись рециркуляторъёс басьтылэмын. Соосты группаысь группае нуллыса ужатозы.
Школаосысь пищеблокъёсын но мукет юрттэт сётӥсь удысъёсын ужасьёс одно ик утиськон арбериосты нуллыны кулэ. Дышетӥсьёс маскаосты мылкыд каремзыя тырыны быгатозы. Вылӥ дышетсконниосын студентъёс но, дышетӥсьёс но маскаосты одно ик нуллыны кулэ.
Кун Кенешлэн Тӧроез Владимир Невоструев пусйиз, туэ дышетскон арез элькунмы выль югдурен кутске, соин ик вань тупатъян ужъёсты дыраз йылпумъяно. Озьы ик саклык висъяно Роспотребнадзорлэсь куронъёссэ быдэсъянлы но 1-ти 4-тӥ классъёсын дышетскисьёсты пӧсь сиёнэн сюдонэз кулэезъя радъянлы.


Возврат к списку