Покчи классъёсын дышетскисьёсты пӧсь сиёнэн сюдон ужпумъёсты эскеризы

Кун Кенешысь наукая, дышетонъя, культурая, йӧскалык но егитъёсын ужан политикая но спортъя ялан ужась комиссилэн кивалтӥсез Татьяна Ишматова котрес ӝӧк сьӧрын кенешон ортчытӥз. Вераськон мынӥз школаослэн покчи классъёсын дышетскисьёсты пӧсь сиёнэн дунтэк сюдыны дасьлыксы сярысь.
Кенешонэ пыриськизы элькунысь дышетонъя но наукая министр Светлана Болотникова, Кун Кенешлэн Тӧроезлэн Нырысетӥ воштӥсез - тазалыкез утёнъя, демографи но семья политикая ӧрилэн кивалтӥсез Надежда Михайлова, агропром огъетъя, музъем кусыпъёсъя но инкуазез утёнъя ӧрилэн кивалтӥсез Владимир Варламов, Кун Кенешысь «Единая Россия» фракцилэн кивалтӥсез Елена Дербилова, депутатъёс, Мерлыко палаталэн ёзчиосыз, дышетон ужъюртъёслэн кивалтӥсьёссы.
Тодады вайытом, 2020 арын толшоре Россилэн Азьмуртэз Владимир Путин Федерал Собранилы вазиськоназ вераз, покчи классъёсын дышетскись вань пиналъёс школаосын дунтэк пӧсь сиён басьтыны кулэ шуыса. Тулыспал толэзе кутэмын кат, кудӥзъя туэ нырысетӥ пӧсьтолэзьысен та косон быдэсъяськыны кулэ.
Кызьы пусйиз Светлана Болотникова, Удмуртиын тулыспал толэзьысен дышетон ужъюртъёслэсь пищеблокъёссэс эскерон кутскиз. Ортчытэмын тупатъян ужъёс, басьтэмын кулэ луись тӥрлык. Али вань школаос понна огъя меню лэсьтӥське. Нырысетӥ куарусёнысен 1-4 классъёсын дышетскисьёсты (87473 адями) пӧсь сиёнэн сюдон кутскоз.
Вераны кулэ, Удмурт Элькунын начальной классъёсты дунтэк сюдон радъямын вал ини. Гурт школаосын дышетскисьёслы ӵукна пӧсь сиён, кар школаосын – пыжиськем но йӧл сётъязы.
Кенешонын ӝутэмын вал школаосы интыысь вуз поттӥсьёслэсь продукцизэс вуттон но нылпиослы чаклам сиёнлэсь ӟечлыксэ эскерон ужпумъёс.