Удмуртиысь Кун Кенеш Росси Кивалтэтлы улон коркаосысь лифтъёсты вошъянъя нимысьтыз федерал программа кылдытыны ӵектоз

Туннэ экономика политикая, промышленностья но инвестициосъя ялан ужась комиссилэн ёзчиосыз Кун Кенешлэсь Росси Кивалтэтлы вазиськон сярысь пуктэтэзлэсь ӵектоссэ умоен лыдъязы. Вазиськон улон коркаосысь лифтъёсты вошъянэн герӟаськемын. Кызьы вераз комиссилэн кивалтӥсез Тимур Ягафаров, та дыре шаеамы 2,5 сюрс лифтъёсты выльдоно. Соос 25 арлэсь кема ужамын ини. Одӥг лифтэз воштон шорлыдын 2 миллион манет тыр усе. Лифтъёсты улон коркаослэн кузёоссылэн бичам коньдонзы чотын вошъяны чакламын. Ужез быдэстыны луонлык кылдэ счётэ кулэ уксёлэн 70-80% бичамын но, со мукет нокыӵе тупатъян ужъёслы кутылэмын ӧвӧл ке. 20% -сэ уксёез элькун но муниципал бюджетъёсысь басьтыны луэ. Али бадӟым люкетаз учыръёсын кузёослэн бичам коньдонзы кулэезлэсь 30-40% гинэ луэ. Бюджетысь юрттэтэн но со лифтэз воштыны уг тырмы. Таӵе учыръёсы кредит но жилищно-коммунальной возёсэз выльдонъя Фондысь юрттэт басьтыны луонлык сётэмын. Но ӵемысьгес кредит огазеяськонъёслэн уже пыриськемзы уг поты. «Нимысьтыз федерал программатэк югдурез тупатыны уз луы. Лифтъёсты вошъян ужпум туннэ Удмуртия понна гинэ ӧвӧл, лэчыт луэ Россиысь мукет улосъёс понна но», - шуиз Тимур Ягафаров. Ваньзэ тае лыдэ басьтыса, Росси Кивалтэтэз лифтъёсты вошъянъя федерал программа кылдытыны куро. Экономика политикая, промышленностья но инвестициосъя ялан ужась комиссилэн ёзчиосыз Кун Кенешлэн Президиумезлы та ужпумез матысь сессие поттыны ӵекто. Чакламъя, сессия куарусён толэзе ортчоз.