Версия для слабовидящих
Эскеремын Дэри ёросэз азинтонъя лэчыт ужпумъёс

Эскеремын Дэри ёросэз азинтонъя лэчыт ужпумъёс

07.08.2020
Кун Кенешлэн Тӧроезлэн Нырысетӥ воштӥсез Надежда Михайлова тазалыкез утёнъя, демографи но семья политикая ялан ужась ӧрилэсь кенешонзэ ортчытӥз. Эскеремын Дэри ёросэз азинтонэн герӟаськем лэчыт ужпумъёс. Депутатъёс саклык висъязы калыклы эмъюрттэт сётон ужпумъёслы но ёросысь демографи югдурлы.
Кызьы вераз Дэри ёрос эмъяськоннилэн валтӥсь эмчиез Елена Наговицына, туэ южтолэзьысен ёрос эмъяськонни коронавирусэн черламъёсты йӧнатыны кутскиз. Со понна ужъюртэ компьютер томограф, рентген, ультразвук тӥрлык, ИВЛ но мукет аппаратура пуктылэмын. Тупатъямын стационарлэн юртэз.
2020 арын гуртъёсысь эмпунктъёсы «Земский фельдшер» программая 5 фельдшеръёс но амбулаториосы «Земский доктор» программая 9 ӧнерчиос вуизы. Озьы ке но, ужасьёсын югдур лэчыт на. Эмчиос нылпи садъёсын но школаосын уг тырмо.
Лэчыт ужпумъёс пӧлын озьы ик – паллиативной эмъюрттэт сётонэз радъян, автопаркез выльдон.
Надежда Михайлова валтӥсь врачлы но Дэри ёрос эмъяськонниысь вань ужасьёслы тау кариз коронавируслэн пандемиез дыръя пайдалыко ужамзы понна. Соослэн тыршеменызы больница вакчи дыр куспын куронъёслы тупась ковид-центрлы пӧрмытэмын вал.
Ёросысь демографи югдур сярысь ивортон лэсьтӥз Дэри ёрос администрацилэн тӧроезлэн мерлыко огъетъя воштӥсез Гульнара Шнейдер. Со пусйиз, ёросын улӥсьёслэн лыдзы арлы быдэ 2 сюрс адямилы йылэ шуыса. Туэ нырысетӥ толшорлы со 79 470 адями вал.
Ёросэ трос улӥсьёс вуо Ижкарысь. Со нылпи садъёслы но школаослы ватсаса ныпъет луэ. Отын интыос уг тырмо. Кык ар ӵоже 7 выль нылпи сад пуктэмын ни, туэ эшшо 5-сэ лэсьтыны кутско на. Ваньзэ-ӧвӧлзэ ватсаса 1060 выль инты усьтыны чакламын. Нош кулэяськон 1460 интылы кылдэмын.
2020 арын Пычанки гуртын 825 интылы но Ягулын 500 интылы чаклам выль школаосты лэсьтон мытэмын.
Кенешонэ пыриськисьёс озьы ик трос нылпиё семьяослы юрттэт сётон но гуртын улӥсьёслы эмъюмъёсты вуттон ужпумъёсты эскеризы.
Дэри ёросэз экономика но мерлык удысъёсъя азинтон ужпумъёсты Кун Кенешлэн Президиумаз поттозы.


Возврат к списку