Версия для слабовидящих
Кун Кенешлэн Президиумезлэн ёзчиосыз Удмуртилэн кунлык басьтэмез дырысеныз 100 ар тырмонлы сӥзем ужрадъёслэсь быдэсъяськемзэс эскеризы

Кун Кенешлэн Президиумезлэн ёзчиосыз Удмуртилэн кунлык басьтэмез дырысеныз 100 ар тырмонлы сӥзем ужрадъёслэсь быдэсъяськемзэс эскеризы

03.06.2020
Кун Кенешлэн Президиумезлэн ёзчиосыз Удмуртилэн кунлык басьтэмез дырысеныз 100 ар тырмонлы сӥзем ужрадъёслэсь быдэсъяськемзэс эскеризы. Кенешон дистанционной амалэн радъяськиз. Нуиз сое Владимир Невоструев.
Кызьы ивортӥз Элькунысь йӧскалык политикая министр Лариса Буранова, юбилеез пусъён понна кылдытэмын но ужа элькун оргкомитет, чакламын пӧртэм ужрадъёс. Но эпидемиологи ласянь секыт югдур кылдэмен, пусъем радлыке тупатъянъёс но вошъянъёс пыртано луэ.
Удмуртилэн кунлык басьтэмезлы сӥзем ужрадъёс кылем арысен мыно ини. 2019 арын 4-тӥ шуркынмонэ Глазовын, Удмурт автономилэн нырысетӥ шоркараз, юбилей арез усьтон сӥё-дано ужрад ортчиз. Ижкарын «Мечты - это проСТО» фестиваль радъяськиз. Юбилейлэн аслаз тодметпусъёсыз кылдытэмын, соосты иворъёсты вӧлмытон, кузьмаськон продукция вылэ пуктыло.
100 арез пусъён улсын Удмуртилэн историез, кылыз, аспӧртэмлыко культураез сярысь кӧня ке книга поттэмын. Соос пӧлын – 2 томъем ӟуч-удмурт кыллюкам, туала удмурт поэзилэн, прозалэн но нылпи литературалэн антологиоссы, калык киужъёс сярысь «Секреты удмуртских мастеров» книга.
РАН-лэн Удмурт ёзэтысьтыз кылъя но литературая Институт удмурт кылъя йӧскалык корпус – электрон сӧзнэт - кылдытон бордын ужаны кутскиз. Со удмурт кылэз туала амалъёсын азинтонлэн инъетэз луыны кулэ.
ЮНЕСКО-лэн юрттэмез улсын удмурт сюанлы сӥзем куинь кылын книга поттыны, Удмурт Элькунлэсь атлассэ выльысь печатланы чакламын.
Нырысьсэ онлайн-форматэн орчытэмын вал Бадӟым удмурт диктант. Отчы Россилэн 10 улосъёсысьтыз адямиос пыриськизы. Оштолэзе шаертодонъя «ДаУР» интернет-проект ужаны кутскиз. Со улсын Удмуртиын улӥсьёс шаерысьтымы тужгес тунсыко интыослэсь рейтингзэс кылдытонэ пырисько. Солэн йылпумъянъёсыз туризмез азинтонъя ӵектосъёсты кылдытыны но азинтыны юрттозы.
Лариса Буранова пусйиз, эпидемиологи югдурен сэрен, унозэ калыко ужрадъёсты орчытон дыръёсты вошъяно, нош куд-ог малпанъёслэсь куштӥськоно луэ шуыса.
Куарусён толэзьлы чаклам Удмуртиысь калыкъёслэн конгрессы онлайн амалэн ортчыны быгатоз. «Гербер» удмурт йӧскалык шулдыръяськонлэн но шӧмыз воштӥськоз. Тулыс гырон-кизён ужъёсты йылпумъянлы сӥзем праздник 20-тӥ инвожолы чакламын вал. Али вераськонъёс мыно со интые гудырикошконэ выль емышлы сӥзем «Выль» элькун шулдыръяськон радъяны. Со пандемиен сэрен ортчытыны луымтэ кӧня ке элькун праздникъёсты огазеяны быгатоз.
Кун Кенешысь наукая, дышетонъя, культурая, йӧскалык но егитъёсын ужан политикая но спортъя ялан ужась комиссилэн кивалтӥсез Татьяна Ишматова аслаз содокладаз пусйиз, кунлыклэн 100 ар тырмонэз Элькунлэн азинскон сюрес вылаз нимысьтыз инты басьтэ. Юбилейлы сӥзем ужрадъёс улосчиосмылы вордскем шаерлы яратон но гажан, солэн историеныз тунсыкъяськон мылкыдъёс пыӵатыны кулэ. «Та юбилей огъя улослэн гинэ ӧвӧл, удмурт калыклэн историысьтыз бадӟым вамыш. 100 ар тырмонэз пусъён ӵуказе нуналэ но сюрес возьматӥсь мед луысал», - мылкыдзэ вераз депутат.

Возврат к списку