Кун Кенешлэн Тӧроезлы Нырысетӥ воштӥсе быръемын Надежда Михайлова, воштӥсе – Александр Прозоров

Туннэ Кун Кенешлэн азьвыл чакламтэ кызь витетӥ сессияз депутатъёс элькун парламентлэн кивалтӥсезлы Нырысетӥ воштӥсез бырйизы. Кун Кенешлэн Тӧроез Владимир Невоструев та интые Надежда Михайловалэсь кандидатуразэ ӵектӥз. Татчыозь со Тӧролэн воштӥсез, тазалыкез утёнъя, демографи но семья политикая ялан ужась ӧрилэн кивалтӥсез вал.
«Оскисько, Надежда Александровна – Кун Кенешлэн Тӧроезлы Нырысетӥ воштӥсе - тазалыкез утёнъя, демографи но семья политикая ялан ужась комиссилэн кивалтӥсезлы тужгес тупась кандидатура, - шуиз со. – Со ӟеч тодэ кат кылдытъян ужез, куинетӥ отчам ӵоже ини Ижкарын улӥсьёслэсь тунсыкъёссэс Кун Кенешын уте. Надежда Александровна умой тодэ тазалыкез утён удысысь ужпумъёсты, 11 ар ӵоже кивалтӥз Нырысетӥ элькун эмъяськонниен. Элькунэз азинтонлы трос кужымзэ сётэмез понна, туэ со Удмуртилэн Дано кунмуртэз нимен пусъемын».
Лушкем куара сётонын Надежда Михайловалэн кандидатураез понна дурбасьтэмзэ возьматӥз 54 пӧлысь 52-эз депутат, 2 пумит луизы.
Туннэ ик Кун Кенешлэн Тӧроезлы воштӥсе - кунэз лэсьтонъя, интыысь аскивалтонъя но кышкыттэмлыкъя выль комиссилы кивалтӥсе быръемын Александр Прозоров. Азьвыл со кунэз лэсьтонъя но интыысь аскивалтонъя ӧриен кивалтӥз.
Сое ӵектыса, Владимир Невоструев муниципал кивалтонын, Ижкар Думаын но бизнес-сӧзнэтъёсын быгатыса ужамзэ пусйиз.
Александр Прозоров понна куаразэ 46 депутат сётӥз, 8-эз пумит луизы.
Озьы Надежда Михайлова но Александр Прозоров выль ужан интыосы юнматэмын.
Со сяна, бырйизы экономика политикая, промышленностья но инвестициосъя комиссилы кивалтӥсез. Та уж оскемын Тимур Ягафаровлы. Али ужась ӧтчамын со «ЛДПР» депутат фракциен кивалтӥз.
Лушкем куара сётонын Тимур Ягафаровлэн кандидатураез понна 52 депутат дурбасьтӥз, 2 пумит кариськизы.
Пусъём на – ялан ужась комиссиен Ягафаров мозмытымтэ амалэн кивалтоз, валтӥсь ужан интыез азьвыл сямен ик Научно-производственной фирмаын кылёз.