Версия для слабовидящих
Кун Кенешлэн Президиумез школаосын дышетскисьёслы йылпумъян аттестация ортчытон но 2020 арын вылӥ дышетсконниосы егитъёсты кутон ужпумъёсты эскериз

Кун Кенешлэн Президиумез школаосын дышетскисьёслы йылпумъян аттестация ортчытон но 2020 арын вылӥ дышетсконниосы егитъёсты кутон ужпумъёсты эскериз

19.05.2020
Туннэ Владимир Невоструев дистанционной амалэн элькун парламентлэн Президиумезлэсь кенешонзэ ортчытӥз. Вераськон мынӥз школаосын дышетскон арез йылпумъян но ӧнер сётӥсь но вылӥ дышетсконниосы выль дышетскисьёсты кутон ужпумъёс сярысь.
Кызьы вераз Элькунысь дышетонъя но наукая министр Светлана Болотникова, школаосын тодон-валан сётон та дыре азьланьтӥське дистанционной амалэн. Начальной классъёсысь пиналъёс понна дышетскон ар кыстӥськоз 25 куартолэзёзь, 5-тӥысен 11 классозь нылпиос понна – 30 куартолэзёзь.
30 оштолэзьысен физкультура, ритмика, крезьгур, суредан искусство, технология, кышкытлыкъёслэсь утиськон, анай ӟуч кыл но анай ӟуч литература, кыкетӥ кунгожсьӧр кыл но куд-ог мукет тодметъёсъя дышетон йылпумъямын.
Эпидемиологи югдурен сэрен, 9 классэз йылпумъясь егитъёс огъя кун экзаменъёслэсь мозмытэмын. Соослы йылпумъян дунъетъёс пуктылэмын луозы ар ӵоже басьям оценкаоссыя.
Дас одӥгетӥ классэз йылпумъясьёс понна куартолэзе дышетскон мынэ со предметъёсъя, кудъёсызъя пиналъёс огъя кун экзаменлы дасясько. Сое вылӥ дышетсконниосы пырыны чаклась муртъёс гинэ сётоно луозы, валэктӥз Светлана Болотникова. Аттестат лэсьтӥськоз ар ӵоже басьям оценкаосъя но толсуре гожтэм сочиненилэн йылпумъянъёсызъя. ЕГЭ-эз сётон дыр 8 инвожоысь бергес вакытлы выжтэмын. Экзаменъёс кышкыттэмлыкъя куронъёсты чакласа радъяськозы, оскытӥз министр. Школаез но дышетскон арез йылпумъянлы сӥзем ужрадъёсты он-лайн амалэн ортчытъяны ӵектэмын.
Вылӥ дышетскониосы приёмной кампаниосты радъян ужпумъёс сярысь вераз Удмуртиысь вузъёслэн ректоръёссылэн Кенешсылэн кивалтӥсез, Удмурт кун университетлэн ректорез Галина Мерзлякова. Туэ дышетскисьёсты кутон вань ужрадъёс дистанционной амалэн мынозы, пусйиз со. Абитуриентъёслэсь ужкагазъёссэс кутон, егитъёслэсь тодон-валанъёссэс эскерон но соосын огкылъёс гожтон – ваньмыз радъяськоз палэнысен. Ужкагазъёсты дышетсконниослэн сайтъёсазы, озьы ик кун но муниципал услугаосъя огъя портал пыр сётыны луоз.
Вылӥ дышетсконниосын бюджет интыослэн лыдзы туэ будэтэмын, шуиз Галина Мерзлякова. Нырысьсэ Удмуртилы творческой ӧнеръёслы но культураен герӟаськем удысъёслы бюджет чотын дышетскон интыос сётэмын. Озьы ик йылэтэмын целевой дышетонлы квотаос. УдГУ-лэн ректорез пусйиз кун но муниципал тӧрлык ёзъёслэн но уж сётӥсьёслэн валче ужанзылэсь кулэлыксэ. Со кулэ вань целевой интыосты тырмытон понна. Со сяна, Удмурт кун университетлэн сайтаз уж сётӥсьёслы чаклам нимысьтыз онлайн-сервис ужаны кутскиз.
Вузъёсы выль дышетскисьёсты кутон вакыт Россиын 19 инвожоысен кутске. Со нуналысен куриськонъёсты сётыны луэ ини. Ужкагазъёсты сётон вакытлэн йылпумъяськон дырыз вошъяськоз ЕГЭ-эз сётъян но соослэсь йылпумъянъёссэс шараян дыръёсын ӵош, валэктӥз Мерзлякова. Баллъёссы тырмись муртъёсты дышетсконние кутыны быгатозы соослэн мылкыд каремзыя гинэ, нош аттестатлэсь оригиналзэ вайыны луоз дышетскон ар кутскем бере.
Кун Кенешысь наукая, дышетонъя, культурая, йӧскалык но егитъёсын ужан политикая но спортъя ялан ужась комиссилэн кивалтӥсез Татьяна Ишматова пусйиз, дистанционной амалэн дышетон удысын сэрттэм-пертчемез кулэ карись ужпумъёс трос на. Тужгес но секыт югдур гурт школаосын, кытын туннэ вылӥ ӝоглыко интернет ӧвӧл на.
Татьяна Ишматовалэн верамезъя, Кун Думае дистанционной дышетон амалэз азинтонъя катӵектос келямын. Со та выллем югдуръёсы дышетонэз уретытэк нуон ужпумъёсты радъяны чакламын.
Депутат дышетонъя но наукая министерствоысь но дышетсконниосысь ӧнерчиослы дышетскон арез йылпумъян но вылезлы дасяськон ужпумъёсъя валэктон ужез юнматыны курыса вазиськиз.

Возврат к списку