Версия для слабовидящих
Удмуртиысь Кун Кенеш Росси Федерацилэн Конституцияз ӵектэм воштонъёс сярысь кат понна дурбасьтӥз

Удмуртиысь Кун Кенеш Росси Федерацилэн Конституцияз ӵектэм воштонъёс сярысь кат понна дурбасьтӥз

12.03.2020
Удмуртиысь Кун Кенеш Росси Федерацилэн Конституцияз ӵектэм воштонъёс сярысь кат понна дурбасьтӥз
Удмуртилэн Кун Кенешысьтыз депутатъёс Россилэн Конституцияз пыртоно воштонъёс понна дурбасьтӥзы. Выльдӥськон понна 51 депутат куаразэ сётӥз, 6 мурт малпанзэ веранлэсь возиськиз, пумит луисез ӧй вал.
Сессие люкаськем депутатъёс азьын вераськиз Элькунлэн Тӧроез Александр Бречалов. «Россилэн али ужась Конституциез 1993 арын кутэмын вал, - тодэ вайытӥз со. - Соку кунамы экономикая чылкак мукет югдур вал. Росси Азьмуртлэн Владимир Путинлэн малпамезъя, кунмылэн Конституциез али но ужпумъёссэ быдэсъя, но улонлэсь выльдӥськемзэ лыдэ басьтыса, со тупатъямез кулэ каре».
Кун Кенешысь кунэз лэсьтонъя но интыысь аскивалтонъя ялан ужась ӧрилэн кивалтӥсез Александр Прозоров Кункатэ ӵектэм валтӥсь воштӥськонъёс сярысь вераз. Соос калыклы мерлыко юрттэт сётонэз кужмоятон но куанер улонлэсь утён понна чакламын. Кылсярысь, юнматӥське пенсиослы но пособиослы арлы быдэ одно ик индексация ортчытъян. Мукет валтӥсь интыосыз со - нылпиосты, семьяез но кузпалъёс куспын тупаса улонэз утён.
Кунэн кивалтонын парламентлэн кужымез будэ. Кун Дума, кылсярысь, Росси Кивалтэтлэн Тӧроезлы Азьмуртэн ӵектэм кандидатураез юнматыны луонлык басьтэ. Озьы ик депутатъёс Кивалтэтлэн Тӧроезлы воштӥсе но федерал министръёслы Росси премьер-министрен ӵектэм кандидатураосты юнматъяны быгатозы.
Росси Конституцие воштонъёсты юнматыны луонлык сётэмын парламентлы но Азьмуртлы. Азьло аръёсы со озьы лэсьтӥське вал. Нош таяз учыре Владимир Путин воштонъёсты юнматыны Россиын улӥсьёслы оскиз. 22-тӥ оштолэзе кунын огъя куара сётон ортчоз. Соку кунамы шутэтскон нунал ялэмын луоз. Куара сётонэ пыриськыны ваньмызлы луонлык кылдытэмын луоз. Кун Кенешлэн Тӧроезлэн Нырысетӥ воштӥсез, кышкыттэмлыкъя, Регламентъя но Кун Кенешлэсь ужзэ радъянъя ялан ужась комиссилэн кивалтӥсез Владимир Невоструев верамъя, шаерамы 1164 быръён участок усьтэмын луоз.


Возврат к списку