Версия для слабовидящих
Кун Кенешысь депутатъёс Ольга Абрамовалэсь кандидатуразэ Элькун Кивалтэтлэн воштӥсезлы юнматонэз умоен лыдъязы

Кун Кенешысь депутатъёс Ольга Абрамовалэсь кандидатуразэ Элькун Кивалтэтлэн воштӥсезлы юнматонэз умоен лыдъязы

12.03.2020
Кун Кенешысь депутатъёс Ольга Абрамовалэсь кандидатуразэ Элькун Кивалтэтлэн воштӥсезлы юнматонэз умоен лыдъязы
Туннэ азьвыл чакламтэ 22 сессиын Кун Кенешысь депутатъёс гурт возёсъя но сиён-юон поттонъя министрлэсь Ольга Абрамовалэсь кандидатуразэ Элькун Кивалтэтлэн Тӧроезлы воштӥсе эскеризы. Соин депутатъёсты тодматӥз Элькунлэн Тӧроез Александр Бречалов.
Ольга Абрамова кык ар ужа ни гурт возёсъя но сиён-юон поттонъя министр луыса. Со вордӥськемын Сарапул ёросысь Сигаево черкогуртын. Экономика удысъя кандидат. Ужамын гурт удысъя кӧня ке компаниосын, гурт возёсъя элькун министерствоын экономика ёзэтэтэн кивалтэмын.
«Министр луыса ужатозяз, солэсь быгатэмзэ ваньмыз синйылтизы ни. Туннэ Удмуртия гурт удысъя вань федерал программаосы пыриське. Та ужъя асьмеос Россиын 4-тӥ интыын, - пусйиз Бречалов. - Нош «Я – фермер» акселератор программая – устоез».
Быдэстоно ужъёс трос на, депутатъёс азьын вераськыкуз, пусйиз ачиз Ольга Абрамова. Нырысетӥ интые со пуктӥз гурт удысэ инвесторъёсты кыскон ужез. Кыкетӥез – шаерамы поттэм вузъёсты кунгож сьӧры вузанэз радъян.
«Та сюрес вылэ шаермы али гинэ султэ ай. Но луонлыкъёсмы вань. Йӧл но сӥль продукциен ӵош ӟеч выжыё пудо вузан борды басьтӥськоно. Озьы ик йылэтоно бакча сиён будэтонэз. Соин ӵош ик гурт калыклэсь улон-вылонзэ капчиятон ужпумъёсты быдэсъяно. Озьы гинэ гурт возёслэн но быдэсак гуртлэн азинсконэз луоз», - пусйиз министр.
Кун Кенешысь депутатъёс Ольга Абрамовалы дурбасьтэмзэс лушкем куара сётон пыр возьматӥзы. Вице-премьере юнматон понна куаразэс 49 парламентарийёс сётӥзы, пумит луэмзы сярысь 8-эз веразы. Абрамова выль ужоскетъёссэ быдэсъяны Элькун Тӧролэн Указэз потэм бӧрсьы кутскоз. Со озьы ик министерствоен но кивалтыны кылёз.

Возврат к списку