Версия для слабовидящих
«Калык контролёръёс» никотино суретъёсты вузан интыосты эскеризы

«Калык контролёръёс» никотино суретъёсты вузан интыосты эскеризы

05.02.2020
«Калык контролёръёс» никотино суретъёсты вузан интыосты эскеризы
Туннэ Ижкарын «Калык контроль» ӵектослэн рейдэз ортчиз. Эскерисьёс тамак луисьтэм никотино суретъёсты вузанэз чаклазы. Контролёръёс федерал сӧзнэтъёсысь вузкаронниосы, электрон сигаретъёсын, вейпъёсын, кальянъёсын вузкарись павильонъёсы вуылӥзы. Вузъёсты но соослы ужкагазъёсты чаклам сяна, одӥгаз вузкаронниын эскерон вылысь басьяськизы. Шараяськиз, отын вузлы кулэ ужкагазъёс ӧвӧл шуыса.
Роспотребнадзорлэн Удмурт Элькунъя Управлениысьтыз валтӥсь ӧнерчилэн Зиля Зариповалэн верамезъя, тамак луисьтэм суретъёс сиён-юон пӧлы пыро, соосты вузан но «Сиён-юонлэн кышкыттэмлыкез сярысь» Технической регламентъя радъяське. Соин ик никотино суретъёсты кышкыттэмлык сярысь кагазъёстэк вузан катэз тӥян луэ. Со понна нимаз ужбергатӥсьёс понна 40 сюрс манетозь, юридик муртъёс понна 300 сюрс манетозь штрафъёс чакламын. Никотино суретъёсты вузанэз Роспотребнадзорлэн Управлениез ялан чакласа возе. Туэ толшор толэзь ӵоже гинэ вузкаронниосысь куронъёслы тупасьтэм 800 быртыклэсь ятыр продукци таламын.
Эскерон ужез нуо «Молодая гвардия» огазеяськонлэн ёзчиосыз но. Кызьы вераз солэн улосвыл ёзэзлэн кивалтӥсезлэн воштӥсез Евгений Хафизов, соослы анай-атайёслэсь, никотино суретъёсын эшъяськись пиналъёслэн тодмооссылэсь трос ӝожтӥськонъёс, таче вузъёсты чакламтэ интыосын вӧлмытэм сярысь ивортонъёс вуо.
Агропром огъетъя ялан ужась комиссилэн кивалтӥсез, «Народный контроль» ӵектослэн кураторез Владимир Варламов пусйиз, вузкаронъя куронъёсты быдэсъянэз чаклан азьланьтэмын луоз. Никотино суретъёсты вӧлмытӥсь огазеяськонъёслы кышкыт вузъёссэс утялтыны ӵектозы.
«Катэз тӥянэн нюръяськыны асьмелэн луонлыкъёсмы но, кужыммы но тырмыт. Уж нуо Роспотребнадзор, эрикрадэз утисьёс, мерлыко огазеяськонъёс, егитъёс. Тазьы валче кариськыса, асьмеос обществомес тазагес карыны быгатом», - йылпумъян лэсьтӥз Владимир Варламов.

Возврат к списку