Версия для слабовидящих
Удмурт кылэз кутон радлыкез катэн юнматӥзы

Удмурт кылэз кутон радлыкез катэн юнматӥзы

16.02.2022
Удмурт кылэз кутон радлыкез катэн юнматӥзы
15-тӥ тулыспалэ Удмуртиысь Кун Кенешлэн 37-тӥ сессияз «Удмурт Элькунысь кун кылъёс но Удмурт Элькунысь калыкъёслэн мукет кылъёссы сярысь» катэ воштонъёс пыртӥзы, соос удмурт кыллэсь улосвылысь кун кыллэсь сямен инлыксэ юнматонэн но азинтонэн герӟаськемын.
Кызьы вераз элькунысь йӧскалык политикая министрлэсь ужзэ быдэсъясь Эдуард Петров, 2001-тӥ арын кутэм катэ удмурт кылэз кун кылэз сямен кутонэз, мукет калыкъёслэсь кылъёссэс утёнэз но азинтонэз радъян ласянь умоятонъёс пыртыны кулэ вал.
«Удмурт Элькунысь кун кылъёсты но мукет калыкъёлэсь кылъёссэс утён но азинтон, дышетон но кутон ласянь кун тӧрлыкысь быдэсъясь ёзэслэн ужоскетъёсыз пусйымтэ. Озьы ик ивортодэт но реклама удысын кусыпъёсты радъян ӧвӧл. Со дыре ик, туала улонын, куке ужан удысъёсты одӥг кабе вуттон но стандартъя лэсьтон юнгес луэ, калыклэсь аспӧртэмлыксэ утёнын кыл уката бадӟым инты басьтэ», - шуиз Удмуртиысь йӧскалык политикая министрлэсь ужзэ быдэсъясь Эдуард Петров.
Озьы, катэ удмурт кылэз элькунысь кун кылэз сямен кутон радлыкъя выль ёзэт пыртӥзы. Отын верамын, Удмуртиын удмурт кылэз кун кылэз сямен кутон дыръя туала литературной кыллэсь эспъёссэ, шонер гожъяськон но пуспуктылон куронъёсты юнматон радлыкез улосвыл кивалтэт пусъёз шуыса. Со сяна, кун но мукет кылъёсты утён, дышетон но кутон понна кылкутӥсь ёзэс пусъемын – со Удмуртиысь йӧскалык политикая министерство. Плакатъёс, баннеръёс, афишаос, стендъёс, цифровой видеоэкранъёс но мукет ивортодэт сётон арбериос элькун коньдэт чотын лэсьтӥсько но вӧлмытӥсько ке, соосты кык кун кылъёсын гожтонэз радъян ужез уполномоченной ёзэслы юнматӥзы. Со удмурт кылэз ивортодэт сётон но мукет адӟоно вӧлметын кутонэз будэтон, сое кун кылэз сямен ӟуч кылэн огкадь кутон ужез рос-прос нуыны луонлык сётоз.
«Асьмелэн кун ужъюртъёсын интыяськись трос ивортодэт, туж трос реклама. Со ӟуч кылын гинэ ӧвӧл, удмуртэн но мед луоз, со туж кулэ. Кылсярысь, Ижкарысь выль уян бассейнлэн нимыз кык кун кылъёсын. Элькунысьтымы кык кун кылъёсты огкадь кутон котькытын луыны кулэ. Катэ тупатонъёс пыртыса, ми пумкылъян кутӥмы, коньдэт чотын интыяськись вань ивортодэт кык кун кылъёсын мед луоз: ӟуч но удмурт», - пусйиз Кун Кенешлэн Тӧроез Владимир Невоструев.

Возврат к списку