Версия для слабовидящих
Удмуртиысь Кун Кенеш егитъёслы юрттонъя ватсаса ӵектонъёс дасялоз

Удмуртиысь Кун Кенеш егитъёслы юрттонъя ватсаса ӵектонъёс дасялоз

11.10.2021
Удмуртиысь Кун Кенеш егитъёслы юрттэт сётонъя ватсаса ӵектонъёс дасялоз. Со сярысь туннэ вераз элькун парламентлэн спикерез Владимир Невоструев.
Со пусйиз, 8 коньывуонэ Пензаын Приволжск федерал округысь каткылдытъясьёслэн Ассоциацизылэн кенешоназ егитъёсын ужан политикалэсь быдэсъяськемзэ эскерем бере, кылдытэмын нимысьтыз ужась группа. Со егитъёсын ужанъя катрадлыке воштонъёс дасяны кулэ. Толэзь ӵоже улосвылъёслэсь та ласянь ӵектонъёссэс бичалозы, собере, огазеяса, соосты федерал тӧрлык ёзъёсы келялозы.
Тодады вайытом, Ассоциацилэн кенешоназ Владимир Невоструев Удмуртилэн егитъёсын ужан политикаез сярысь вераз, та ужез умоятонъя аслэсьтыз дэмланъёссэ шараяз. Кылсярысь, элькун парламентлэн спикерез гуртъёсын уж интыос усьтӥсьёслы федерал юрттэт кылдытыны ӵектӥз.
Со сяна, егитъёсты вордӥськем улосвылъёсазы кельтон понна, Удмуртиысь Кун Кенешлэн Тӧроез егит ӧнерчиослы улон инты лэсьтыны федерал бюджетысь уногес коньдон висъяны, гуртъёсын сяна, улон инты лэсьтонэз каръёсы но вӧлмытыны дэмлаз. Озьы ик Владимир Невоструев дышетсконниосты йылпумъям егит ужасьёсты ӧнерзыя уже интыянэз радъяны ӵектӥз.
«Кун Кенешысь физкультурая, спортъя но егитъёсын ужан политикая комиссия та ужен рос-прос выроз, егитъёсын пумиськылыса, кулэ ужрадъёсты дасялоз. Вань ӵектонъёсты огазеялом но Ассоциацие келялом», - шуиз Владимир Невоструев.



Возврат к списку