Удмуртиын студент отрядъёслы кун ласянь юрттэт сётонъя кат ужаны кутскиз

Туннэ, 5 коньывуонэ, кужымаз пыриз студент отрядъёслы кун ласянь юрттэт сётонъя элькун кат. Со 7 куарусёнэ, Кун Кенешлэн куамын ньылетӥ сессияз кутэмын вал.
Кат кун тӧрлык ёзъёслэсь студент отрядъёслы юрттонъя ужоскетъёссэ, амалъёссэ но ужрадъёссэ юнматэ.
Пусъемын, кун студент отрядъёслы валэктон, ивор сётон, уж сётӥсьёсын кусып тупатон, егитъёсты ужлы дасян, отрядъёсы выль ёзчиосты кысконъя ужрадъёсты ортчытон, егитъёслэн но нылпиослэн огазеяськонъёссылы ӵектосъёссэс быдэсъян ужъёсын юрттыны быгатэ шуыса.
Удмурт Элькун таӵе катэз нырысетӥосыз пӧлын кутӥз. Кызьы вераз Кун Кенешысь физкультурая, спортъя но егитъёсын ужан политикая ялан ужась комиссилэн кивалтӥсез Иван Черезов, Удмуртиысь студент отрядъёс быдэс Россиын адӟем карымон луо. Арлы быдэ элькунысьтымы 1000-лэсь ятыр студентъёс лэсьтӥськон интыосын, нылпи лагерьёсын, чугун сюрес вылын, гурт возёсын, эмъяськонниосын ужало.
Нимысьтыз кат та движениез эшшо но умойгес азинтыны, ужан отрядъёсы тросгес егитъёсты кыскыны, соослы асьсэды ужын, творчествоын, мерлыко удысын усьтыны луонлыкъёс кылдытоз.

туспуктэмез Удмуртиысь Студент отрядъёслэн пресс-службазылэн