Удмуртиын Константин Яковлевез – кунлык басьтон уже пыриськем азьветлӥсез – буре ваён пул усьтӥськиз

31 оштолэзе Алнаш ёросысь Кузёбай гуртын удмурт прозаикез, драматургез но кылбурчиез, Удмуртилы кунлык басьтон понна ужам Константин Яковлевез буре ваён ужрадъёс ортчизы. Отчы пыриськизы Кун Кенешысь наукая, дышетонъя, культурая, туризмъя но йӧскалык политикая ялан ужась комиссилэн кивалтӥсез Татьяна Ишматова, тодосчиос, дышетӥсьёс, ёрос администрациын ужасьёс, «Удмурт кенеш» огазеяськонлэн ёзчиосыз.
Константин Яковлев удмурт литературае шӧдскымон пытьы кельтӥз. Со гожъяз нылпиослы но, арлыдоослы но, «Виль синь» газетэз поттонэ пыриськиз. Ужаз удмуртъёслэсь Нырысетӥ Огъяросси Ӧтчамзэс люкан бордын. Ӵапак отын огкылэ вуэмын вал удмурт калыклэн аслаз мылкыд каремезъя РСФСР-е пыронэз сярысь.
Ӧтчамын озьы ик удмурт кунлыкез кылдытон, Наркомнацысь удмуртъёслэн ужъёссыя Комиссариталэн ужамез, удмурт кылын книга-газет поттон, ужакагазъёсты нуон сярысь но вераськон мынӥз.
1932 арын 17 куартолэзе Константин Яковлев Кузебай Гердлэн ужезъя ӝегатэмын но пытсэт сьӧры келямын вал. 1937 арын 1 шуркынмонэ - Кузебай Гердэн одӥг нуналэ – Соловецкой шормуӵъёсын ыбемын. 1956 арын ӟеч нимыз берыктэмын.
Азьветлӥсез сӥлы карыса, Кузёбай школалэн юртэз вылэ Константин Яковлевез буре ваён пул юнматӥзы. Дышетсконни 2004 арысен солэсь нимзэ нуллэ ини. Та нуналэ ик школаын Константин Яковлевлы сӥзем книгаен тодматскон ортчиз.
«Кузёбай гуртын ортчиз сюлэмез бугыртӥсь ужрад. Сӥземын вал со Константин Сергеевич Яковлевлы, одӥгезлы удмурт азьветлӥсьмылы, кудӥз тыршиз удмурт кунлыкез кылдытон бордын, Кузебай Гердэн одӥг нунал репрессировать каремын, одӥг нуналэ ик ыбемын вал "калыклэн тушмонэз" шуыса.... Сомында пол синкылиосме воземе ӧз луы. Кыӵе дунъя но данъя туннэ но Кузёбай калык Яковлев сярысь тодэ ваёнъёсты», - пусйиз Татьяна Ишматова.