Версия для слабовидящих
Кун Кенешлэн матысь сессияз депутатъёс 17 катӵектосъёсты эскерозы

Кун Кенешлэн матысь сессияз депутатъёс 17 катӵектосъёсты эскерозы

15.02.2021
Кун Кенешлэн матысь сессияз депутатъёс 17 катӵектосъёсты эскерозы
Туннэ Кун Кенешлэн Тӧроез Владимир Невоструев Элькун парламентлэн Президиумезлэсь кенешонзэ ортчытӥз. Депутатъёс Кун Кенешлэн матысь сессиезлэн ужанрадаз ватсаса 20 ужпум пыртӥзы. Озьы куамынэтӥ сессилэн ужанрадлыказ огъя 35 ужпум люкаськиз. 17-ез со – элькун катъёслэн ӵектосъёссы.
Эскеремын луозы Удмурт Элькунлэн Кункатаз, 2021 арлы бюджет, патент амалэн выт тырон, анай-атайтэк кылем пиналъёслы улон инты висъян, физкультура но спорт сярысь элькун катъёсы воштонъёс.
Сессиын коня ке отчётъёс чузъяськозы. Соос пӧлын Удмуртиысь кунпуш ужпумъёсъя министерстволэн но адямилэн эрикрадъёсызъя уполномоченнойлэн кылем арын ужамзы сярысь ивортонъёс.
Депутатъёс озьы ик Кун Кенешлэсь туэлы каткылдытъянъя ужанрадлыксэ юнматыны кулэ. Планлэн ӵектосаз ваньзэ-ӧвӧлзэ 60 ужпум пыртэмын. Соос пӧлысь 13-ез – инъет луись катӵектосъёс. Кылсярысь, туэ Кун Кенеш нимаз адямиослэсь возёсъёссэс – ЛПХ-осты - азинтон сярысь кат юнматыны кулэ. Гужем студентъёслэн отрядъёссы сярысь нимысьтыз катӵектосэз эскерыны чаклало.
Туннэ ик депутатъёс Кизнер ёросэз экономика но мерлык удысъёсъя азинтон сярысь вераськозы. Сессилэсь азьвыл та ужпумез котькуд комиссиын но Президиумлэн кенешоназ эскеризы ини, вераськизы ёрослэн котькуд удысъя азинскыны луонлыкъёсыз сярысь. Ёросъёслэсь улэм-вылэмзэс тазьы пыр-поч эскерон мынэ Кун Кенешлэсь муниципал огазеяськонъёсын валче ужанзэ но кусыпъёссэ юнматон улсын.
«Кивалтэт час» улсын элькун Кивалтэтлэн экономикая блокезлэн 2020 арын ужамез сярысь ивортон кылзэмын луоз.
Тодады вайытом, Кун Кенешлэн 30-тӥ сессиез усьтӥськоз чуказе, 2021 арын 16 тулыспалэ, 10.00 часын.




Возврат к списку