Андрей Исаев Глазкарысь коркаослэсь вылъёссэс тупатъянъя программа дасяны ӵектӥз

Глазкарын коркаослэсь вылъёссэс тупатъянъя программа кылдытэмын луыны быгатоз. Сыӵе амал кутӥське ини Санкт-Петербургын. Со сярысь 19 гудырикошконэ, Глазове ветлыкуз, вераз Росси Кун Думаысь «Единая Россия» фракцилэн кивалтӥсезлэн Нырысетӥ воштӥсез Андрей Исаев.
«Уноез коркаос Сталин кивалтон вакытэ пуктылэмын ай. Квартираосыз отын ӧжыт. Та юртъёслэсь вылтуссэс кулэезъя тупатъян понна шуг-секытъёс кылдо. Ужъёслы капитальной ремонтъя фондысь уксёез кутоно ке, липетъёсты, гумыосты вошъяны коньдон уз тырмы ини. Санкт-Петербуглэн та ласянь нимысьтыз программаез вань. Со «Фасады Санкт-Петербурга» шуыса нимаське. Питерлэн Кун Думаысь депутатъёсызлэсь материалъёссэс учком но малпалом, кызьы та выллем программа Глазкарын быдэсъяськыны быгатоз, луоз-а отчы федерал, улосвыл, муниципал коньдэтъёсысь но бизнеслэсь уксёзэс кыскыны», - шуиз Андрей Исаев.
Удмуртиысь Кун Кенешлэн Тӧроеныз Владимир Невоструевен, Глазовлэн тӧроеныз Сергей Коноваловен ӵош со кӧня ке интыосы вуылӥз, механикая Чупчи заводын, мерлыко удысын ужасьёсын, дышетон удысысь профсоюзлэн ёзчиосыныз, Глазовысь ёроскуспо больницаысь эмчиосын пумиськылӥз.
Вераськон мынӥз пӧртэм ужпумъёсъя. Адямиос огъя Россиысь югдурен тунсыкъяськизы, юалляськизы мерлыко гарантиос сярысь.
Эмъяськонниын ужасьёс ӝожтӥськизы ӧнерчиослэн тырмымтэзылы. Со понна карлэн но элькунлэн огъя программазы вань, но соин чаклам коньдон кулэезлэсь ӧжыт. Эмчиосты интые ваён но кельтон ужрадъёслы со уг тырмы. Югдурез тупатыны луысал, карын «Земский доктор» федерал программа ужасал ке. Но Глазкарын улӥсез туннэ 50 сюрс адямилэсь ятыр, соин ик со программае уг сюры.
Андрей Исаев верамъя, Кун Думаысь уноез депутатъёс та ужпумез тодо. Соос программае вань моногородъёсты пыртыны дэмлало. Ӵектон кутэмын луиз ке, Глазов «Земский доктор» программае пыртэмын луыны быгатоз.
Депутат оскытӥз та но, пумиськонъёсын чузъяськем мукет куронъёсъя но уж азьланьтӥськоз шуыса.