Версия для слабовидящих
Удмуртилэн гурт интывылъёсты азинтонъя федерал программае пыриськемез сярысь вераськизы

Удмуртилэн гурт интывылъёсты азинтонъя федерал программае пыриськемез сярысь вераськизы

17.06.2020
Туннэ Кун Кенешлэн Президиумезлэн ёзчиосыз гурт интывылъёсты азинтонъя федерал программалэсь Удмуртиын быдэсъяськемзэ эскеризы. Кенешонэз онлайн амалэн нуиз Кун Кенешлэн тӧроез Владимир Невоструев.
Кызьы вераз Элькун Кивалтэтлэн Тӧроезлэн воштӥсез – гурт возёсъя но сиён-юон поттонъя министр Ольга Абрамова, 2019 арын кутэм программа шаерамы ужаны кутскиз 2020 арысен. Отчы та дырозь ужам «Социальное развитие села» программаысь ваньмыз ужрадъёс пыризы. Озьы ик выль ёзэтъёс потӥзы. Соос пӧлын – гуртын ужан интыос кылдытонъя, улон интыос лэсьтонъя, сюресъёсты тупатъянъя но калыко интыосты умоятонъя ужрадъёс.
2020 арын Удмуртия конкурсъёсын вормем но федерал программае сюрем ӵектосъёслы 1 миллиард 137 миллион манет коньдон басьтӥз. Солэн быдӟалаезъя шаермы Россиысь улосвылъёс пӧлын 4-тӥ луиз.
Одӥгез тужгес паськытэз ӧр – улон инты лэсьтонэз азинтон. Азьвыл чаклам юрттэтъёс вӧзы туэ отын выль ужрадъёс ватсаськизы. Соос пӧлын – муниципал огазеяськонъёслы наймъя огкылъёсъя улон инты лэсьтыны юрттэт висъян. Озьы ик ужаны кутскиз гурт ипотека. Туннэ нуналлы Удмуртиын 2,7 процентысен ставкаосъя ог миллиард манет тыр кредитъёс висъямын ини. Та займъёслы Удмуртиын 3800 куриськон сётэмын, вераз Ольга Абрамова.
Гуртъёсысь инженер инфраструктураез азинтон понна 2020 арын 48,7 миллион манет чакламын, 39,4 миллион манетэз со – федерал уксё. Коньдонэн Яр каргуртысь «Новый» микрорайонын ву сӧзнэт, Каракулино ёросысь Черново, Глазов ёросысь Дзякино но Яр ёросысь Дизьмино гуртъёсын газ гумыос кыскемын луозы.
Кез, Шаркан но Кияса ёросъёсын 25 иськем гурт сюресъёсты тупатъяны чакламын.
Игра, Кез, Селта но Шаркан ёросъёсысь гурт интывылъёсты азинтонъя ӵектосъёс «Гуртъёслэн туала тусъёссы» программалэн вормисьёсыз луиз. Соос огъя 684,5 миллион манет утӥзы. Та уксёен Кез каргуртысь эмъяськоннилы но со вӧзысь микрорайонлы чылкытатӥсь сооружениос лэсьтэмын луозы. Шарканын культурая центр но ву но газ выль сӧзнэтъёс кылдозы.
Али Удмуртия 2021 арлы конкурсъёсы пыриськыны дасяське. Отчы куриськонъёсты кутон 22 инвожое кутскоз. Улослэсь огъя куриськонэ 19 ёросъёслэн 11 ӵектосъёссы пыртэмын луоз. Проектъёсъя 108 выль объект лэсьтыны, транспорт но тӥрлык басьтыны чакламын. Ужъёслэн огъя дунзы – 2 миллиард 457 миллион манет.
Министрлэн верамезъя, туннэ сюлмаськытэ проектной ужкагазъёсты дасян. Со сяна, шугъяськонъёс кылдо бюджетлэн палэнысьтыз коньдон кысконэн. Нош со – конкурсъёсын вормон понна одӥгез валтӥсез курон.
Агропром огъетъя, музъем кусыпъёсъя, инкуазез уже кутонъя но сое утёнъя ялан ужась ӧрилэн кивалтӥсез Владимир Варламов умоен пусйиз министерстволэсь программае пыриськонъя ужамзэ, муниципалитетъёслы ужкагазъёсты дасяны юрттэмзэ.
«КПРФ» депутат фракцилэн кивалтӥсез Алексей Конорюков - кенешонэз ортчытонлэн одӥгез кичӧлтӥсез - Элькун Кивалтэтын гурт интывылъёсты азинтон ужпумъёсын вырись нимысьтыз группа кылдытыны ӵектӥз.
Кун Кенешлэн Тӧроез Владимир Невоструев элькун парламентысь но интыосысь депутатъёсты муниципал огазеяськонъёсты конкурсъёслы дасянэ пыриськыны ӧтиз. "Выль программалэн нырысетӥ ужан арез ик пайдалыксэ возьматэ ини. Удмуртиысь 30 процентэз калык гуртын улэ. Та лыдпуслэн йылэмез шӧдӥське. Нош гуртъёсын улон ӟечлык со дыре ик сюлмаськытэ: уг тырмо чылкытатон сооружениос, ву но газ сӧзнэтъёс…Али 2025 арозь куриськонъёсты бичан мынэ. Макем ӝоггес дасялом ужкагазъёсты, сокем тросгес луонлыкъёс кылдозы гуртъёсты азинтыны. Соин ик асьмелы но муниципал огазеяськонъёслы рос-прос юрттӥськоно", - шуиз Владимир Невоструев.
Гурт интывылъёсты азинтонъя программалэсь быдэсъяськемзэ Удмуртиысь элькун парламент Росси Кун Думаысь депутатъёсын ӵош эскероз на, будэтӥз Кун Кенешлэн Тӧроез.

Возврат к списку