Версия для слабовидящих
Эскеризы Удмурт Элькунлэсь 2019 арлы коньдэтсэ быдэстон ужпумез

Эскеризы Удмурт Элькунлэсь 2019 арлы коньдэтсэ быдэстон ужпумез

05.06.2020
Туннэ Кун Кенешысь тазалыкез утёнъя, демографи но семья ужпумъёсъя но наукая, дышетонъя, культурая, йӧскалык но егитъёсын ужан политикая но спортъя ялан ужась комиссиослэн огазеям кенешонзы ортчиз. Вераськон дистанционной амалэн радъяськиз. Депутатъёс Удмурт Элькунлэн 2019 арлы коньдэтэзлэн быдэстӥськемез сярысь катлэсь ӵектоссэ эскеризы.
Кызьы вераз Элькунысь коньдон ужпумъёсъя министрлэн воштӥсез Вера Сухих, Элькун Кивалтэт азе бюджетъя пуктэм ужпумъёс быдэстэмын. Коньдэтлэн табышъёсыз 80 млрд 651 млн манет люкаськизы, со 10 процентлы тросгес азьвыл арын сярысь. 57 млрд 431 млн манетэз табышъёс – вытъёсъя тыронъёс, 22 млрд 798 млн манетэз – федерал юрттэт. Вераны кулэ, федерал бюджетысь коньдон 4,5 млрд. манетлы тросгес луиз 2018 арын сярысь.
2019 арын Удмуртиын 82 млрд 949 млн манет уже кутэмын. Азьвыл арынлэсь со 16 процентлы ятыргес.
Вера Сухих пусйиз, 2019 арын шаерамы йӧскалык проектъёс ужаны кутскизы. Удмуртиын 12 ӵектосъёс пӧлысь 11-ез быдэсъясько, соосъя 51 улосвыл проектъёс юнматэмын. Отысь ужрадъёслы кылем арын 10 млрд 989 млн манет кутэмын, 7 млрд 27 млн манетэз со – федерал уксё. Бюджетлэн палэнысьтыз но кыскем коньдонэз лыдэ басьтыса, йӧскалык проектъёслы Удмуртиын 16 млрд 655 млн манет уже кутэмын.
Азьвыл сямен ик, бюджетысь уксё программаосъя висъяське. Шаерамы кылем арын 29 кун программаос ужазы. Котькудӥзъя коньдон висъян йылӥз.
Бадӟым люкетэз - 54 млрд 200 млн манетэз – уксё мынӥз мерлыко ужпумъёсты быдэсъяны. Со пӧлысь 27 млрд манетэз «Развитие образования» программалы кошкиз. «Развитие здравоохранения» кун программая 2019 арын уже кутэмын 12 млрд 815 млн манет, «Социальная поддержка граждан» программая - 9 млрд 686 млн. манет.
Экономика удыслы 2019 арын 16 млрд 249 млн бюджет коньдон кутӥськиз. 7 млрд 593,5 млн манет «Развитие транспортной системы» программалы висъямын, агропром огъетлы – 2 млрд 109 млн манет. Лэсьтӥськон удыслы 5 млрд 545 млн манет висъямын. 2018 арын сярысьт со 52 процентлы тросгес.
9 млрд 438 млн бюджет коньдон мынӥз кун ужоскетъёсты быдэсъяны. Соос пӧлы ик пыре интыосысь бюджетъёслы дотациос висъян но кун пунэмъёсты возён. Озьы 2019 арын муниципалитетъёслы юрттэтлэн быдӟалаез 33 млрд 749 манетозь вуиз. Со 13 процентлы ятыргес 2018 арын сярысь, пусйиз коньдон ужпумъёсъя министрлэн воштӥсез.
Кылем арлэн йылпумъянъёсызъя, элькун бюджетлэн огъя табышъёсыз 80 млрд 651 млн. манет, уже кутэм уксёлэн быдӟалаез 82 млрд 949 млн манет луиз. Дефицит - 2 млрд 298 млн манет. Кун пунэмлэн быдӟалаез 971 млн манетлы кулэстэмын. Вера Сухихлэн верамезъя, Россиысь коньдон ужпумъёсъя министерствоен та ласянь кутэм Огкыллэн куронъёсыз быдэстэмын.
Депутатъёс катӵектосэз умоен лыдъязы. Кун Кенешлэн Тӧроезлэн Нырысетӥ воштӥсез Надежда Михайлова пусйиз, 2019 арын эмъюм басьтыны, эмужъюртъёслэсь тӥрлыксэс выльдыны шӧдскымон тросгес коньдон висъяськиз.
Наукая, дышетонъя, культурая, йӧскалык но егитъёсын ужан политикая но спортъя ялан ужась комиссилэн кивалтӥсез Татьяна Ишматова пусйиз, культура, йӧскалык политика, спорт удысъёслы умой юрттэт висъяськиз. Со калыклы кулэ луись уно проектъёсты быдэстыны луонлык сётӥз.

Возврат к списку