Удмурт Элькунын 2020 арын ужаны кутскись катъёс сярысь
09.01.2020
2020 арын толшорысен Удмурт Элькунын 2019 арын кутэм кӧня ке улосвыл катъёс ужаны кутско.
1 толшорысен кужымаз пыре энергетик юонъёсты быдэ вуымтэослы вузанэз алӥсь кат (кутэмын Удмуртиысь Кун Кенешен 28.11.2019) 1 толшорысен 2020 арын Удмуртиын 18 ареслэсь егит муртъёслы энергетик суретъёсты вузаны лэземын ӧвӧл. Таӵе юонъёс озьы ик нылпи, дышетскон но эмъюртъёсысь, физкультурая но спортъя ужъюртъёсысь, вузкарон автоматъёсысь палэнтэмын луыны кулэ.
1 толшорысен 2020 арын кужымаз пыре Удмурт Элькунысь интыосысь аскивалтон ёзъёсты куд-ог ужоскетъёссэс быдэсъямысь дугдытон сярысь кат (кутэмын Удмуртиысь Кун Кенешен 29.10.2019). Соя анай-атайтэк но соослэн чакламзытэк кылем пиналъёсын ужез нуон Удмурт Элькунысь мерлыко политикая Министерстволы сётӥське.
1 толшорысен ужаны кутско «Удмурт Элькунысь транспортлы выт сярысь» Элькун катэ воштонъёс (кутэмын Удмуртиысь Кун Кенешен 24.09.2019). Законэн трос нылпиё семьяослы транспорт вытлы 50-процентъем капчиятон тупатӥське. Сое басьтыны быгато вань трос нылпиё семьяос, табышъёссэс лыдэ басьтытэк. Капчиятон чакламын одӥг транспортлы, двигательлэн кужымез 150 вал кужымлэсь бадӟым луыны кулэ ӧвӧл.
1 толшорысен кужымазы пыро «Удмурт Элькунысь куд-ог катъёсы воштонъёс пыртон сярысь» катлэн 1 но 2 ёзэтъёсыз (кутэмын Удмуртиысь Кун Кенешен 24.06.2019). Закон индустриальной (промышленной) паркъёслэн резидентъёссылы ватсаса капчиятонъёс кылдытэ. Соос 5 арлы транспортлы вытъёслэсь мозмытӥсько, капчи автомобильёслы налогъёслэсь сяна. Озьы ик 5 арлы ваньбурлы выт тыронлэсь мозмытӥсько управляющей компаниос, ваньбурзы асьсэ балансазы пыре но индустриальной парклэн интывылаз интыяськемын ке.
10 толшорысен кужымазы пырозы элькун катрадлыке пыртэм воштонъёс, кудъёсызъя быдэ вуымтэослы тамак луисьтэм никотино суретъёсты – снюсъёсты но пэкъёсты – вузан дугдытӥське (кутэмын Кун Кенешен 27.12.2019). Закон никотино сыскон арбериосты быдэ вуымтэослы вузанэз дугдытонэз чакла. Озьы ик таӵе суретъёсты вузкарон автоматъёсысь палэнтыны косэ.
Куронъёсты тӥям понна административной штрафъёс чакламын:
- нимаз адямиослы куиньысен вить сюрс манетозь;
- ужоскето адямиослы куамын сюрсысен витьтон сюрс манетозь;
- юридик муртъёслы – витьсю сюрсысен одӥг миллион манетозь.