Версия для слабовидящих
Кун Кенешысь депутатъёс Элькун Тӧролэн «Удмурт Элькунын югдур сярысь» докладэзлы дунъет сётӥзы

Кун Кенешысь депутатъёс Элькун Тӧролэн «Удмурт Элькунын югдур сярысь» докладэзлы дунъет сётӥзы

17.12.2019
Кун Кенешысь депутатъёс Элькун Тӧролэн «Удмурт Элькунын югдур сярысь» докладэзлы дунъет сётӥзы
Туннэ Кун Кенешлэн азьвыл чакламтэ сессияз Элькунлэн Тӧроез Александр Бречалов депутатъёс азьын «Удмурт Элькунын югдур сярысь» доклад лэсьтӥз. Ивортоназ со котькуд муниципал огазеяськонлы саклык висъяз, вераз, кыӵе воштӥськонъёс возьмало ёросъёсты но каръёсты вуоно арын. Докладын озьы ик вераськон мынӥз эмъюрттэт, мерлыко утет сётон, трос нылпиё семьяослы юрттӥськон, интывылъёсты азинтон ужпумъёс сярысь.
Депутатъёс докладын ӝутэм ужпумъёслэсь лэчытлыксэс пусйизы но соосты быдэсъяны дась луэмзэс веразы. Кун Кенешлэн Тӧроезлэн Нырысетӥ воштӥсезлэн, кышкыттэмлыкъя, Регламентъя но Кун Кенешлэсь ужзэ радъянъя комиссилэн кивалтӥсезлэн Владимир Невоструевлэн верамезъя, докладын адями сярысь сюлмаськон шӧдӥське. Отын рос-прос верамын вуоно арын калыклэн улоназ пыроно воштӥськонъёс сярысь.
Кун Кенешлэн Тӧроезлэн воштӥсез, тазалыкез утёнъя, демографи но семья политикая ӧрилэн кивалтӥсез Надежда Михайлова шумпотэмзэ вераз адямиослы дунтэк эмъюмлы чаклам коньдонэз будэтон пумысен. Докладын чузъяськиз, солы одӥг миллиард манет висъяськоз шуыса. «Та – милям, депутатъёслэн, кӧня ке ӧтчамъёс ӵоже ини пуктылӥськись куронмы», - шуиз Михайлова.
«Единая Россия» факцилэн кивалтӥсез Елена Дербилова умоен пусйиз, Тӧро калыклэсь кичӧлтонъёссэ азинтонлэсь кулэлыксэ пусйиз шуыса. Калыкен ӵектэм проектъёсты быдэсъянлы коньдон висъянэз будэтыны чакламын. Озьы ик докладын верамын вал гурт интывылъёсты азинтон, лэсьтӥськон, мерлыко юртъёсты выльдон но тупатъян, вылӥ ӝоглыко интернетэз вӧлмытыны чакланъёс сярысь.
«КПРФ» фракцилэн кивалтӥсез Алексей Конорюков пусйиз, Удмуртилэн Тӧроез Быдӟым Атыкай оже пыриськемъёслы синпелетъёсты тупатъянлэн кулэлыкез сярысь вераз шуыса.
Кунэз лэсьтонъя но интыысь аскивалтонъя комиссилэн кивалтӥсез Александр Прозоров вераз, докладын огшоры буш лыдпусъёс ӧй вал шуыса. Ваньмыз – быдэстоно ужъёс, нимысьтыз тӧрлык ёзъёс азе пуктӥськись рос-прос ужпумъёс.
Депутатъёс умой дунъет сётӥзы Элькун Тӧроен дэмлам «Ёлка желаний» нимо проектлы но. Александр Бречалов секыт улон юдуре сюрем пиналъёслэсь Выль ар куронъёссэс быдэстонэ пыриськыны ӧтиз. Со понна Кун Кенешлэн юртаз нимысьтыз кыз интыямын. Владимир Невоструевлэн со вылысь басьтэм шудоназ ньыль нылпиё семьялэн куронэз сюриз. Солы куасъёс но планшет кулэ. Надежда Михайлова кигуруми костюм басьтыны куронэн шар поттӥз.

Возврат к списку