Версия для слабовидящих
Удмуртилэсь Дано кунмуртсэ Валентин Тубыловез 84 арес тырмонэныз ӟечкылазы

Удмуртилэсь Дано кунмуртсэ Валентин Тубыловез 84 арес тырмонэныз ӟечкылазы

13.11.2019
Удмуртилэсь Дано кунмуртсэ Валентин Тубыловез 84 арес тырмонэныз ӟечкылазы Туннэ Кун Кенешлэн Тӧроезлэн нырысетӥ воштӥсез, кышкыттэмлыкъя, Регламентъя но Кун Кенешлэсь ужзэ радъянъя ялан ужась ӧрилэн кивалтӥсез Владимир Невоструев Валентин Кузьмич Тубыловез 84 арес тырмонэныз ӟечкылаз. Удмуртилэн Дано кунмуртэз вордӥськем нуналаз вань удмуртъёслэн «Удмурт кенеш» ассоциацизылэн Пичи Кенешезлэн ужаз пыриськиз. Валентин Тубылов та огазеяськонэн 10 арлэсь кема кивалтӥз. Вань ужан сюресэз герӟаськемын Удмуртиен. Лэсьтӥськись бордысен кутскыса, вуиз Элькунлэн Вылӥ Кенешезлэн Тӧроез дорозь. Соку со улосвыллэн вылӥ кивалтӥсез вал.
Владимир Невоструев пусйиз, Валентин Кузьмичлэн быгатонлыкъёсыз, тодон-валанъёсыз но юн сямыз 90-тӥ аръёсы шаерамы огсыр улонэз утьыны юрттӥзы шуыса. Элькун парламентлэн нырысетӥ вице-спикерез Валентин Тубыловлы юн тазалык, шудбур но кема улон аръёс сӥзиз. Со Кун Кенешлэн Тӧроезлэсь Алексей Прасоловлэсь ӟечкылан гожтэтсэ сётӥз. Отын шуэмын:
«Гажано Валентин Кузьмич!
Ӟечкыласько Тӥледыз 84 арес тырмонэныды! (…) Тӥ кивалтӥды Элькунмылэсь Кункатсэ кылдытонъя комиссилэн уженыз. Туэ 7 толсуре асьмеос та ужкагазлэсь 25 ар тырмонзэ пусъём.
Тӥ кивалтэм улсын Удмуртилэн туала тодметпусъёсыз – кунпусэз (гербез), куншетэз (флагез) но кункрезез (гимнэз) кылдӥзы.
Тӥ трос лэсьтӥды элькунамы парламентаризмез азинтон понна. Тӥ Вылӥ Кенешлэн 10, 11, 12 ӧтчамъёсызлэн депутатсы вал, Кун Кенешлэн Президиумезлэн ёзчиез, кивалтӥды гуртысь депутатъёслэн фракциенызы.(…)
Туннэ Тӥ – Удмурт Элькунлэн Дано кунмуртэз. Тау тыршемды понна! Юн тазалык Тӥледлы! Котьку мед котыртоз Тӥледыз яратон, ӟечлык но гажан!»




Возврат к списку