Версия для слабовидящих
Кун Кенешын элькунлэн 2020 арлы бюджетэзлэн ӵектосэзъя кылзонъёс ортчизы

Кун Кенешын элькунлэн 2020 арлы бюджетэзлэн ӵектосэзъя кылзонъёс ортчизы

12.11.2019
Кун Кенешын элькунлэн 2020 арлы бюджетэзлэн ӵектосэзъя кылзонъёс ортчизы
Туннэ Кун Кенешлэн юртаз элькун бюджетлэн вуоно арлы ӵектосэзъя калык кылзонъёс ортчизы. Отчы пыриськизы Кун Кенешысь депутатъёс, Элькун Кивалтэтлэн, мерлыко огазеяськонъёслэн ёзчиоссы, ёрос кенешъёслэн депутатъёссы, профсоюзъёсын кивалтӥсьёс.
Коньдэтэз эскеремлэсь азьвыл кылзонъёсы пыриськисьёс Удмуртилэн мерлык но экономика удысъёсъя азинскон прогнозэныз тодматскизы. Ивортон лэсьтӥз Элькунысь экономикая министр Михаил Тумин. Чакламъя, 2019 арын шаерамы поттэм огъя ваньбурлэн быдӟалаез 646 миллиард манет луоз. 2020 арын со 675 миллиард манетозь вуоз. Инфляцилэн быдӟалаез таиз ар пумозь 3% луоз. Вуоно арлэн йылпумъянъёсызъя со 3,3 % вуоз. Та лыдпусъёс улосвыл бюджетлэсь коньдэтсэ дасяку инъет карыса кутэмын.
Бюджетлэн ӵектосэныз тодматӥз коньдон ужпумъёсъя министр Станислав Евдокимов. Солэн верамезъя, коньдэт азьын сылӥсь валтӥсь ужпумъёс пӧлын – кунлэсь мерлыко тыронъёссэ быдэсъян, кун пунэмлэсь быдӟалазэ кулэстон, йӧскалык проектъёсты улонэ пыӵатон, экономикалэсь валтӥсь удысъёссэ азинтон. Ӵектосэн котькуд мылкыд карись адями тодматскыны быгатэ. Со интыямын Интернет сӧзнэтын.
Кивалтэтлэн чакламезъя, 2020 арын элькунлэн табышез 70 миллиард 108 миллион манет луоз. Со пӧлысь 57 миллиард 370 миллион манетэз – вытъёсъя тыронъёс, 12 миллиард 738 миллион манетэз – федерал бюджетысь дотациос, субсидиос но субвенциос.
Уже кутыны чакламын 69 миллиард 138 миллион манетэз. Со пӧлысь 74% яке 51 миллиард 14 миллион манет мерлыко кун программаосты быдэсъяны мыноз. 16% яке 11 миллиард 185 миллион манет - экономикая программаослы, 9% яке 6 миллиард 24 миллион манет мыноз кун ужоскетъёсты быдэсъяны но муниципал бюджетъёслы юрттӥськыны.
Коньдон ужпумъёсъя министр пусйиз, кыкетӥ лыдӟонлы лыдпусъёс шӧдскымон воштӥськыны быгатозы шуыса.
Кылзонъёслэн йылпумъянъёсынызы протокол Кун Кенешлэн сессияз юнматӥськоз. Со ужзэ кутскоз 28 шуркынмонэ. Соку ик элькун бюджетлэн ӵектосэз нырысетӥ лыдӟемен эскериськоз. Кыкетӥ лыдӟон чакламын толсур толэзьлы.


Возврат к списку