Ижкарын Кун Думаысь энергетикая комитетлэн кенешонэз ортчиз

Кун Думаысь энергетикая комитетлэн кивалтӥсез Павел Завальный Ижкарын котрес ӝӧк сьӧрын кенешон ортчытӥз. Со сӥземын вал дыкужым сӧзнэтэз цифровой ужан амалъёсы выжтон ужпумъёслы. Удмуртилэн шоркарез со понна юнме быръемын ӧвӧл – асьме дорын нырысьёсыз пӧлын ужаны кутскиз цифровой диспетчер пункт. Со бордысен электросӧзнэтъёсын кивалтонэз цифровой амалъёсы выжтон кутске.
«Электроэнергетикаын цифровизация туннэ туж ӝог мынэ, - пусйиз Павел Завальный. – Но удысэз туала куронъёслы тупась карон понна со гинэ тырмыт ӧвӧл. Огъя сӧзнэт туннэ шуг югдуре вуэмын. Соин ик выльдӥськонэз но огъя ортчытоно».
Кун Думаысь комитетлэн кивалтӥсезлэн малпамезъя, электроогъетэз нимаз кузёослы вузаны кариськон туж ик шонер ӧй вал. Та удыс котьку кунлэн монополияз луэ вал. Нош уно кузёос кылдэмен, потӥзы аналтэм езъёс, соин валче электрокужым тус-тас луыны кутскиз, огъя кивалтонлэн пайдалыкез усиз. Та тырмымтэосты палэнтон понна, тарифъёсты кылдытон ужез кужмоятоно, кунлэсь кивалтонын интызэ пусъёно.
Удмуртиысь Кун Кенешлэн Тӧроезлэн нырысетӥ воштӥсез Владимир Невоструев пусйиз, цифровизациез ортчытонын каткылдытъян ужлэн но интыез бадӟым шуыса. «Удмуртиысь парламент та ласянь Кун Думаен ужаны дась», -вераз вице-спикер.
Электроэнергетика удысын выльдӥськон 2011 арын йылпумъяськиз. Но солэсь катрадлыкъя инъетсэ выльдон мынэ на туннэ но. Солэн валтӥсь ужпумъёсыз – тарифъёсты кылдытонэз удыслэсь пайдалыксэ ӝутонэн герӟан, электрокужымъя оптовой но розничной вузпӧръёсты азинтон.
Кенешонын чузъяськем вань ӵектонъёс келямын луозы кун тӧрлык ёзъёсы.