Кун Кенешын школаын дышетскись пиналъёс но студентъёс понна кунлыкъя Урок ортчиз

Сизьыметӥ шуркынмонэ Кун Кенешын калыкъёслэн огазеяськон нуналзылы, Удмуртилэн кунлык басьтон нуналэзлы но Михаил Тимофеевич Калашниковлэн вордскем дырысеныз 100 ар тырмонлы сӥзем кунлыкъя Урок ортчиз. Отчы студентъёс но школаын дышетскись пиналъёс пыриськизы.
Егитъёслы вазиськиз Кун Кенешлэн Тӧроез Алексей Прасолов. Огазеяськыса гинэ калык бадӟым вормонъёс басьтыны быгатэ, шуиз со. Сое возьматӥз 1612 ар, куке Кузьма Минин но Дмитрий Пожарский кивалтэм улсын калык Москваез тушмонлэсь мозмытӥз. Огазеяськон Россилы юрттӥз вормыны 1812 но, 1945 но аръёсы. Парламентлэн кивалтӥсез тодаз ваиз Михаил Тимофеевич Калашниковен пумиськонъёссэ. «Кунмылэсь утиськон кужымзэ юнматэм сяна, тодмо конструктор Удмуртилэсь экономиказэ но азинтыны юрттӥз, шаермес но предприятиосмес данэ поттӥз», - пусйиз Алексей Прасолов.
Наукая, дышетонъя, культурая, йӧскалык но егитъёсын ужан политикая но спортъя ялан ужась ӧрилэн тӧроез, «Удмурт кенеш» ассоциацилэн кивалтӥсез Татьяна Ишматова удмурт азьветлӥсьёс сярысь вераз. Максим Прокопьев, Трофим Борисов, Иосиф Наговицын, Кузебай Герд 20 даурлэн кутсконаз удмурт кунлыкез кылдытон бордын ужазы.