Версия для слабовидящих
Яр ёросысь Вортча гуртын выльдэм культура юрт усьтӥськиз

Яр ёросысь Вортча гуртын выльдэм культура юрт усьтӥськиз

01.10.2019
Яр ёросысь Вортча гуртын выльдэм культура юрт усьтӥськиз
Кун Кенешлэн Тӧроезлэн Нырысетӥ воштӥсез Владимир Невоструев но элькун парламентысь депутат Андрей Волков 1-тӥ коньывуонэ Яр ёросысь Вортча гуртысь выльдэм культура юртэз усьтонэ пыриськизы. Ужрадэ озьы ик вуылӥзы Элькунысь культурая министр Владимир Соловьёв, Яр ёрослэн Тӧроез Алексей Старцев, гуртысь улӥсьёс но ӧтем куноос.
Ужъюртын выльдон-тупатъян ужъёс кутскизы 2016-тӥ арын «Единая Россия» партилэн «Культура малой родины» ӵектосэз улсын. Уксё элькун бюджетысь но висъяськиз. Культура юртлэсь липетсэ тупатъязы, вӧлдэтсэ, выжъёссэ выльдӥзы, выль электротӥрлык пуктӥзы.
2019-тӥ арын «Культура» йӧскалык ӵектос улсын 707 сюрс манет висъямын. Со уксёен культура юртлэсь пушсэ тупатъязы, выль сцена лэсьтӥзы.
Вортча гуртын удмуртъёс но ӟучъёс, бигеръёс но бесерманъёс уло. Ваньзы соос выльдэм культура юртлэсь устӥськемзэ чидатэк возьмазы. Праздникын быгатонлыкъёссэс возьматӥзы Вортча школаын дышетскисьёс, гуртысь усточиослэн коллективъёссы. Гуртоос оскемзэс веразы, табере лулчеберетъя юрт пӧртэм арлыдо муртъёсты огазеялоз шуыса.
Та нуналэ ик Владимир Невоструев но Андрей Волков Яр, Юкаменск но Глазов ёросъёслэн Дано кунмуртъёсынызы пумиськылӥзы, соосты арлыдоослэн калыккуспо нуналэнызы ӟечкылазы.


Возврат к списку