Версия для слабовидящих
Удмуртилэн 2019-тӥ арлы коньдэтаз воштонъёс пыртэмын

Удмуртилэн 2019-тӥ арлы коньдэтаз воштонъёс пыртэмын

25.09.2019
Удмуртилэн 2019-тӥ арлы коньдэтаз воштонъёс пыртэмын
Кун Кенешлэн дас куатетӥ сессияз воштонъёс пыртэмын Элькунлэн 2019-тӥ но 2020-2021-тӥ аръёслы бюджетаз. Коньдон ужпумъёсъя министрлэн Станислав Евдокимовлэн верамезъя, та воштонъёс кун но муниципал ужъюртъёсты ужатыны, йӧскалык проектъёсты улонэ пыӵатыны, Удмурт Элькунэз азинтонъя Стратегиен пуктэм ужпумъёсты быдэсъяны луонлык сётозы.
Нырысетӥ лыдӟонын коньдэтлэн табыш люкетаз 2 миллиард 748 миллион 348,2 сюрс манет ватсамын. Ӝыныезлэсь ятырез со - вытъёсъя тыронъёс, 1 миллиард манетэз – федерал бюджетысь юрттэт.
Уже кутон люкетэ озьы ик 2 миллиард 748 миллион 348,2 сюрс манет тыр воштонъёс пыртэмын. Уксё кӧня ке ӧръёсъя кутӥськоз. 71 миллион 467,4 сюрс манет ватсаны чакламын «Демография» но «Экология» йӧскалык проектъёслы. 23,7 миллион манет висъяськоз стационарын эмъяськем муртъёсты санаторийёсын йӧнатонлы, озьы ик пинал вайыны дасяськись нылкышноосты но али вордскем нуныосты эскеронлы.
5,8 миллион манет кутӥськоз школаосы улосвыл учебникъёсты но пособиосты басьтыны, нимаз кузёосын возиськись нылпи садъёслы юрттэт сётыны, озьы ик анай-атайтэк кылем пиналъёсты вордыны басьтӥсь семьяослы одӥг пол сётӥськись пособиез тырыны.
Сӧсыръёслы уж инты кылдытон но арлыдоослэсь улон ӟечлыксэс ӝутон ужпумъёслы ог 97 миллион манет йылэтыны ӵекто. 80 миллион манет палаез со коммунальной юрттӥськетъёс понна компенсация тырыны кутӥськоз.
Гуртъёсы ужаны мынэм егит дышетӥсьёслы нырысетӥ куинь ар ужамзы понна юрттэт сётыны 10,7 миллион манет ватсаны чакламын.
Федерал бюджетысь вуэм юрттэт чотын ветеранъёслы улон инты басьтон, сюресъёсты тупатъян, покчи но шор ёзо ужбергатонэз азинтон но мукет ужпумъёслы коньдонэз будэтыны ӵектэмын. Со сяна, ватсаса уксё учкемын муниципал театръёслы но культура юртъёслы юрттэт сётыны, М. Т. Калашниковлэн юбилеезлы сӥзем ужрадъёсты ортчытыны.
Катӵектослэн кыкетӥ лыдӟонэзлы 25 тупатъянъёс вуизы. Куинез соос табыш люкетэн геӟаськемын. Со 380,7 миллион манетлы йылэтэмын на. Уксёез федерал коньдэтысь возьмало. Со пӧлысь 324 миллион 66,3 сюрс манетэз мыноз пичи ужбергатонэз, со пӧлын ик – крестьян но фермер огазеяськонъёсты азинтыны. 18 861,2 сюрс манетэз федерал коньдон лэземын луоз гурт интывылъёсты азинтон программалы.
Коньдэтлэн уже кутон люкетаз 19 тупатъянъёс пыртэмын.
Воштонъёсты лыдэ басьтыса, Элькунлэн 2019-тӥ арлы бюджетэзлэн табыш люкетэз 82 961 451,5 сюрс манет луоз. Уже кутон люкетлэн быдӟалаез - 84 738 963,5 сюрс манет. Дефицитлэн быдӟалаез уг воштӥськы, со - 1 777 512 сюрс манет.

Возврат к списку