Версия для слабовидящих
Ужъя, мерлыко политикая но ветеранъёслэн ужпумъёссыя ӧри Удмуртилэн 2019-тӥ но вуоно аръёслы коньдэтаз воштонъёсты эскериз

Ужъя, мерлыко политикая но ветеранъёслэн ужпумъёссыя ӧри Удмуртилэн 2019-тӥ но вуоно аръёслы коньдэтаз воштонъёсты эскериз

13.09.2019
Ужъя, мерлыко политикая но ветеранъёслэн ужпумъёссыя ӧри Удмуртилэн 2019-тӥ но вуоно аръёслы коньдэтаз воштонъёсты эскериз
Кун Кенешысь ужъя, мерлыко политикая но ветеранъёслэн ужпумъёссыя ӧри Удмуртилэн 2019-тӥ но 2020-2021-тӥ аръёслы коньдэтаз воштонъёс пыртон сярысь катлэсь ӵектоссэ эскериз. Кызьы вераз элькунысь коньдон ужпумъёсъя министрлэн воштӥсез Вера Сухих, воштонъёс кун но муниципал ужъюртъёсты ужатыны, йӧскалык проектъёсты улонэ пыӵатыны, Удмурт Элькунэз азинтонъя Стратегиен пуктэм ужпумъёсты быдэсъяны луонлык сётозы.
Коньдэтлэн табыш люкетаз 2 миллиард 748 миллион 348,2 сюрс манет ватсаны ӵектэмын. Ӝыныезлэсь ятырез со - вытъёсъя тыронъёс, 1 миллиард манетэз – федерал бюджетысь юрттэт.
Уже кутон люкетэ озьы ик 2 миллиард 748 миллион 348,2 сюрс манет тыр воштонъёс пыртыны чакламын. Уксёез кӧня ке ӧръёсъя кутыны ӵекто. 71 миллион 467,4 сюрс манет ватсаны чакламын «Демография» но «Экология» йӧскалык проектъёслы. 23,7 миллион манет висъяськоз стационарын эмъяськем муртъёсты санаторийёсын йӧнатонлы, озьы ик пинал вайыны дасяськись нылкышноосты но али вордскем нуныосты эскеронлы.
5,8 миллион манет кутӥськоз школаосы улосвыл учебникъёсты но пособиосты басьтыны, нимаз кузёосын возиськись нылпи садъёслы юрттэт сётыны, озьы ик анай-атайтэк кылем пиналъёсты вордыны басьтӥсь семьяослы одӥг пол сётӥськись пособиез тырыны.
Сӧсыръёслы уж инты кылдытон но арлыдоослэсь улон ӟечлыксэс ӝутон ужпумъёслы ог 97 миллион манет йылэтыны ӵекто. 80 миллион манет палаез со коммунальной юрттӥськетъёс понна компенсация тырыны кутӥськоз.
Гуртъёсы ужаны мынэм егит дышетӥсьёслы нырысетӥ куинь ар ужамзы понна юрттэт сётыны 10,7 миллион манет ватсаны чакламын.
Федерал бюджетысь вуэм юрттэт чотын ветеранъёслы улон инты басьтон, сюресъёсты тупатъян, покчи но шор ёзо ужбергатонэз азинтон но мукет ужпумъёслы коньдонэз будэтыны ӵектэмын. Со сяна, ватсаса уксё учкемын муниципал театръёслы но культура юртъёслы юрттэт сётыны, М. Т. Калашниковлэн юбилеезлы сӥзем ужрадъёсты ортчытыны.
Воштонъёсты лыдэ басьтыса, Элькунлэн 2019-тӥ арлы бюджетэзлэн табыш люкетэз 82 580 763,2 сюрс манет луоз. Уже кутон люкетлэн быдӟалаез - 84 358 275,2 сюрс манет. Дефицитлэн быдӟалаез уг воштӥськы, со - 1 777 512 сюрс манет.
Комиссиысь депутатъёс ӵектэм воштонъёсты умоен лыдъязы. Катӵектосэз Кун Кенешлэн вуоно сессияз юнматыны кулэ.


Возврат к списку