Версия для слабовидящих
Алексей Прасолов лэсьтӥськисьёсты ӧнер праздникенызы ӟечкылаз

Алексей Прасолов лэсьтӥськисьёсты ӧнер праздникенызы ӟечкылаз

09.08.2019
Алексей Прасолов лэсьтӥськисьёсты ӧнер праздникенызы ӟечкылаз
Ижкарын лэсьтӥськисьёслэн ӧнер праздниксылы сӥзем сӥё-дано ужрад ортчиз. Удысын ужасьёсты ӟечкылазы Элькунлэн кивалтӥсьёсыз. Элькунлэн Тӧроеныз Александр Бречаловен но Элькун Кивалтэтлэн Тӧроеныз Ярослав Семёновен ӵош ужрадэ пыриськиз Кун Кенешлэн Тӧроез Алексей Прасолов.
Со лэсьтӥськисьёслэсь Быдӟым Атыкай ож аръёсы геройлыко тыршемзэс пусйиз. «Элькунамы со вакытэ кӧня ке ожгар предприятиос выжтэмын вал. Лэсьтӥськисьёс соосты пуктон бордын ужазы. Каменщикъёслэн нылкышно бригадаоссы чаклам ужез 800 процентлы быдэсъязы, - шуиз Алексей Прасолов. – Туннэ асьмеос тыршиськом, вордӥськем шаермы чебергес но чебергес мед луоз шуыса».
Кун Кенешлэн Тӧроез Элькунлэн Тӧроезлы но тау карон кылъёссэ вераз.
Кызьы пусйиз Александр Бречалов, шаерысьтымы лэсьтӥськон но тупатъян-выльдон удысэ инвестициос, кылем арен ӵошатыса, 2 но ӝыны поллы йылӥзы но 8 миллиард манетозь вуизы. Удмуртиын та вакытэ «Большой ремонт» нимо ӵектос быдэсъяське. Со улсын мерлыко ужъюртъёсты лэсьтон-тупатъянлы умой коньдон висъямын.
Быдэстоно ужъёс трос на. Списокын 700 юрт - соослэсь липетъёссэс, укноосэс, инжнер коммуникациоссэс выльдоно. Пӧлазы 485 школа но нылпи сад. Озьы ик тупатэмез кулэ каро 50-лэсь ятыр эмъяськонниос, 65 ФАП, 70 пала культура юртъёс, спортъя 7 объект.
Йӧскалык проектъёс улсын туэлы элькунэ 17 миллиард манетлэсь ятыр коньдон висъяськиз. Пуктэмын луозы 4 выль школа, 27 ясли, Воткаын - Йӧ дворец, Шарканын - куасэн бызьылонъя центр.
Таяз арын ӧсъёссэ усьтӥз Ижкарысь Ленин ёросысь поликлиника. Сое пуктон 2013-тӥ арысен кыстӥськиз. Огъектэз йылаз-пумаз вуттыны Росси Президентлэн резерв фондысьтыз висъям коньдон юрттӥз. Озьы ик корка пыронзэ пусйиз 15 ФАП. Ваньмаз отын выль тӥрлык пуктэмын.
Туэ лэсьтӥськисьёс эшшо одиг эмужъюрт борды басьтӥськизы. Федерал коньдэт чотын туберкулёзъя элькун больница пуктыны кутскизы.
Мукетыз ужпум – улон инты пуктонэз йылэтон. Со чакламын «Жильё и городская cреда» йӧскалык проектэн. 2024-тӥ арозь улон инты лэсьтонъя лыдпусъёсты араз 998 сюрс квадрат метрозь будэтыны кулэ. Туэ 732 сюрс квадрат метр улон инты лэсьтэмын луоз. Нырысетӥ паларын 417 сюрс квадрат метр пуктэмын ини.
Праздникын устооссэ ужасьёсты кун данъетъёсын пусйизы.

Возврат к списку