Версия для слабовидящих
Алексей Прасолов пыриськиз Приволжск федерал округысь кат кылдытъясьёслэн Ассоциацизылэн кенешоназ

Алексей Прасолов пыриськиз Приволжск федерал округысь кат кылдытъясьёслэн Ассоциацизылэн кенешоназ

28.06.2019
Алексей Прасолов пыриськиз Приволжск федерал округысь кат кылдытъясьёслэн Ассоциацизылэн кенешоназ Удмуртиысь Кун Кенешлэн Тӧроез Алексей Прасолов но кышкыттэмлыкъя, Регламентъя но Кун Кенешлэсь ужзэ радъянъя ӧрилэн кивалтӥсез Елена Дербилова Приволжск федерал округысь кат кылдытъясьёслэн Ассоциацизылэн 56-тӥ кенешоназ пыриськизы. Пумиськон Иннополис карын ортчиз.
Парламентарийёс инновациослэн, цифровой технологиослэн Татарстанын улонэ пыӵамзы сярысь вераськизы. Озьы ик кенешизы йӧскалык проектъёсты быдэсъян, покчи бизнеслы юрттэт сётонэн герӟаськем ужпумъёс сярысь. Кенешлэн ужаз Росси Азьмуртлэн Приволжск федерал округъя оскем муртэз Игорь Комаров но Татарстанлэн Азьмуртэз Рустам Миниханов пыриськизы.
Удмуртиысь Кун Кенешлэн Тӧроез Алексей Прасолов вераськоназ нимысьтыз саклык висъяз интыысь аскивалтон ёзъёслэн туала вакытэ ужамзылы. Со вераз муниципал округъёс кылдытон сярысь. Соосты кӧня ке гуртъёсты огазеяса кылдытыны чакламын. Удмуртилы та амал умой тупа.
Алексей Прасолов туала сӧзнэтэз воштыны куинь бадӟым мугъёсты висъяз. Туннэ тросэз гурт поселениос вылӥын сылӥсь бюджетъёс чотын уло. 2-3 миллион манетъем бюджетысьтызы 60 процентэз кивалтон аппаратсэс возьыны кошке. Котькуд поселениын асьсэлэн депутатъёссы вань на. Быръёнъёсыз радъяны ватсаса коньдон кутӥське. Гурт администрацилы одӥг депутатэз быръён понна шорлыдын 110-120 сюрс манет быре.
Кыкетӥез йырвисён - пичи муниципал кылдытэтъёсы калык депутатэ уг мыны. Адямиос лыдъяло, коньдон ӧвӧлэн сюлмаськытӥсь ужпумъёсты быдэстыны уз луы шуыса.
131-тӥ федерал катэ воштонъёс пыртыны куинетӥез муг - интыын аскивалтон сӧзнэт 2000-тӥ аръёслэн шоразы кылдытэмын. Со дырысен улӥсь калыклэн лыдыз трослы воштӥськиз. Ёросъёсын 20-25 процентлы, нош поселениосын - 40-50 процентлы ӧжытгес кылиз. Адямиос каръёсы кошко. Куд-ог ёросъёс улӥсьёссылэн лыдзыя гурт поселениослэсь но пичигес кылемын. Югдурез капчиятыны луоз муниципал округъёс кылдытыса, пусйиз Алексей Прасолов. Интыын аскивалтонъя выль сӧзнэтэз Удмуртиын 2020-тӥ-21-тӥ аръёсы пыӵатыны кутскыны чаклало. Бадӟым муниципал кылдытэтъёсын воштӥськонъёс уз луэ.


Возврат к списку