Куд-ог каттӥянъёс понна кылкутон сярысь катрадлыке воштонъёсты эскеризы

Кышкыттэмлыкъя, Регламентъя но Кун Кенешлэсь ужзэ радъянъя ялан ужась ӧрилэн кивалтисез Елена Дербилова «Куд-ог каттӥянъёс понна кылкутон тупатон сярысь» элькун катэ воштонъёсты эскеронлы сӥзем кенешон ортчытӥз. Вераськонэ пыриськизы Элькун прокуратураысь, кунпуш ужпумъёсъя Министерствоысь, муниципал милициысь но катрадлыкез утись мукет ёзъёсысь ӧнерчиос.
Катэз тупатъяны курыса, комиссие вазиськиз Ижкарлэн Администрациез. Ӵектонъёс герӟаськемын дизайн-код сярысь катэз быдэсъянэн. Кызьы вераз Администрациысь муниципал милицилэн Управлениезлэн кивалтисез Дмитрий Шуклин, дизайн-кодэз тӥям понна штрафъёслэн быдӟалазы уноез ужбергатӥсьёс понна шӧдскымон уг луо. Соин ик соос асьсэлэсь нимпулъёссэс куронъёслы тупатыны мылкыд уг каро.
Елена Дербилова пусйиз, кылкутытон улэ кыскон ужрадъёс валэктон ужен ӵош нуиськыны кулэ шуыса. Нимпулэз дасямлэсь азьвыл ик ужбергатӥсь тодыны но валаны кулэ, кыӵе куронъёсъя сое лэсьтоно. Со сяна, шоркарысь валтӥсь урамъёслэн вылтуссы сярысь вераськыку, нимпулъёслы сяна, саклык висъяно асьсэлэн но юртъёслэн тусъёссылы.
Мукетыз ӵектон герӟаськемын ас мылкыд каремъя пӧртэм ялонъёсты ошылонэн. Таӵе уж понна кылкутонэз нимаз ёзэтэ поттыны ӵекто. Озьы ик кылкутон тупатыны куро музъем кесэгъёс вылэ иворъёсты вӧлмытӥсь пӧртэм конструкциосты – штендеръёсты, стендъёсты, ялонпулъёсты но мукет - пуктылэм понна.
Кенешонын чузъяськем вань ӵектонъёсты комиссия уже басьтӥз.