Версия для слабовидящих
Удмуртиысь Кун Кенеш рос-прос пыриськоз «Тазалыкез утён» но «Демография» йӧскалык проектъёсты быдэсъянэ

Удмуртиысь Кун Кенеш рос-прос пыриськоз «Тазалыкез утён» но «Демография» йӧскалык проектъёсты быдэсъянэ

05.04.2019
Удмуртиысь Кун Кенеш рос-прос пыриськоз «Тазалыкез утён» но «Демография» йӧскалык проектъёсты быдэсъянэ
Кун Кенешысь депутатъёс рос-прос пыриськозы «Тазалыкез утён» но «Демография» йӧскалык проектъёсты быдэсъян уже. Со сярысь ивортӥз Удмуртиысь Кун Кенешлэн Тӧроезлэн воштӥсез, тазалыкез утёнъя, демография но семья политикая ялан ужась ӧрилэн кивалтӥсез Надежда Михайлова.
Матысь 3 ар ӵоже Удмуртия йӧскалык проектъёс улсын федерал бюджетысь 3 миллиард манет пала юрттэт басьтыны кулэ. 786 миллион манетэз коньдон туэ вуоз ини. Улосвыл бюджетысь удыслы 3 ар ӵоже 1 миллиард 300 миллион манет пала висъяськоз.
«Тазалыкез утён» йӧскалык проектлэн одӥгез валтӥсез ужпумез – удысэз ужасьёсын тырмытон. Туэ шаерамы «Земский доктор» но «Земский фельдшер» программаосъя 75 врачъёс но 40 фельшеръёс сертификат басьтозы. Гуртэ ужаны мынӥсь вылӥ тодон-валанэн эмчиослы кун ласянь 1 миллион манет юрттэт чакламын. «Земский доктор» программа Россиын 2012-тӥ арысен быдэсъяське. 2017-тӥ арысен нимысьтыз програма ужаны кутскиз фельшеръёс понна но. Гуртэ лыктӥсь шоръёзо ӧнерен ужасьёс 500 сюрс манет басьтыны быгато.
Шаерамы ялэм тазалыкез утён ар улсын нимысьтыз саклык висъяське палэнэ потаса ужан амалъёсты азинтонлы, вераз Надежда Михайлова. Озьы шаерамы радъяськыло «Онкодесант», «Кардиодесант», «Тазалыкъя форум» но мукет ужрадъёс. Пайдалыксэс возьмато гуртъёсты потась тазалыкез эскерон огъетъёс. «Ужасьёс тырмымтэен, гуртъёсын улӥсьёс курадӟыны кулэ ӧвӧл, - пусйиз депутат. – Со понна палэнэ потаса ужан амалъёсты азинтоно».
Туэ 2-тӥ паларын Удмуртиын санитарной авиация но ужаны кутскыны быгатоз. Надежда Михайловалэн верамезъя, туннэ тодмо ӧвӧл на, кӧня коньдон кулэ луоз проектэз быдэсъянлы. Удмуртиын азьвыл шуэрес учыръёс кылдылыку, ӝог эмъюрттэт сётӥсь службалэн ужез радъямын ни вал. Санавиация висись нылпиосыз вакчи дыр куспын эмъюрттэт сётон интыосы вутылыны быгатӥз.

Возврат к списку