Версия для слабовидящих
Ижкарын нылпи парламентлэн нырысетӥ сессиез ортчиз

Ижкарын нылпи парламентлэн нырысетӥ сессиез ортчиз

19.03.2019
Ижкарын нылпи парламентлэн нырысетӥ сессиез ортчиз
Туннэ Ижкарын нылпи парламентлэн нырысетӥ сессиез ортчиз. Солэн ужаз Кун Кенешысь депутатъёс, егитъёслэн парламентсылэн ёзчиосыз, министерствоослэн но ведомствоослэн кивалтӥсьёссы, мерлыко огазеяськонъёслэн азьветлӥсьёссы пыриськизы.
Сессие каръёсысь но ёросъёсысь школаосын дышетскисьёс лыктӥзы. Котькуд делегацие пыртэмын вал школаосысь аскивалтонъя ёзъёсын ужасьёс, волонтёръёс, егитъёслэн движениосазы но огазеяськонъёсазы пыриськисьёс но мылкыд карись пиналъёс.
Кенешон пӧртэм удысъёсъя секциосын радъяськиз. Пинал парламентарийёс соосты сюлэмшугъяськытӥсь ужпумъёсты ӝутӥзы, улонэз радъян сярысь малпанъёссэс но ӵектонъёссэс бадӟымъёслы синмысь синме вераны быгатӥзы.
«Жаляса верано, туннэ тросэз егитъёс асьсэлэсь азьлань сюрессэс, азьлань улонзэс асьсэ ёросъёсынызы но гуртъёсынызы уг герӟало, соослэн бадӟым каръёсы кошкемзы потэ, - шуиз та вераськон бере Кун Кенешысь наукая, дышетонъя, культурая, егитъёсын ужан но йӧскалык политикая, спортъя ялан ужась комиссилэн тӧроез Татьяна Ишматова. - Туж ик тросэз мылкыд уг каро мыныны дышетон, лулчеберет удысэ, лыдъяло, отын шуг-секытъёс трос шуыса. Та бордын асьмеос ӵош кариськыса ужаны кулэ - нылпи парламент, егитъёслэн парламентсы но асьме элькун парламентмы».
Будэтом на, нылпи парламент кенешон ёз выллем ужалоз. Солэн сессиосаз кутэм решениос ӵектонъёс сямен лыдэ басьтӥськозы.

Возврат к списку