Версия для слабовидящих
Дышетон но егитъёсты будэтон ужпумъёс эскериськизы Кун Кенешын «Школа 21 века. Объединяя усилия» кенешонын

Дышетон но егитъёсты будэтон ужпумъёс эскериськизы Кун Кенешын «Школа 21 века. Объединяя усилия» кенешонын

30.01.2019
Дышетон но егитъёсты будэтон ужпумъёс эскериськизы Кун Кенешын «Школа 21 века. Объединяя усилия» кенешонын
Туннэ шаерамы ужа Пермь шаерлэн делегациез. Отчы пыро кун тӧрлык но интыосысь аскивалтон ёзъёсын ужасьёс, школаослэн но егитъёслэн огазеяськонъёссылэн кивалтӥсьёссы. Делегацилэн шаерамы лыктон валтӥсь мугез – дышетон но егитъёсты будэтон удысын ужан амалъёсын тодматскон. Ужлы кутскон сётыса, Кун Кенешын ортчиз «Школа 21 века. Объединяя усилия» кенешон. Отын эскериськизы улосъёсмылэн дышетон удысын валче ужаны луонлыкъёссы.
Элькунамы егитъёсын ужлэн радъяськемез сярысь ивортон лэсьтӥз Кун Кенешлэн Тӧроез Алексей Прасолов. Со вераз, Пермь шаерын сямен ик, кылем арын Удмуртиын но кутэмын вал пиналъёслы патриотизм мылкыд пыӵатон уж сярысь кат. Россиын таӵе закон ӧвӧл на. Нош со егитъёсын но пиналъёсын ужез котыр ласянь нуыны инъет кылдытэ, пусйиз Алексей Прасолов.
Со озьы ик вераз дышетон удыслы кун ласянь коньдон висъянлэн мынэмез сярысь. Со ялан будэ. Туэлы бюджетын та ӧрлы 24 миллиард манетлэсь ятыр уксё чакламын. Со улосвыл коньдэтлэн ог куиньмос люкетэз луэ. Чакламын гуртъёсы ужаны мынӥсь дышетӥсьёслы юрттэт. Нырысетӥ арзэ ужамзы понна соос 40 сюрс манет юрттэт басьто, кыкетӥ ар бӧрсьы – 60 сюрс, куинетӥез бере 80 сюрс манет чакламын. Элькун Тӧролэн Александр Бречаловлэн ӵектэмезъя, 2019-тӥ арысен сыӵе юрттэт сётӥськоз каръёсысь школаосы но лыктэм егит дышетӥсьёслы. Али шаерысьтымы дышетон удысын ужасьёс шӧдскымон егитомизы, пусйиз Удмуртилэн парламентэзлэн кивалтӥсез. Туннэ 20 процентэз дышетӥсьёс – 35 аресозь егит муртъёс.
Егитъёсын ужлы нимысьтыз саклык висъя Кун Кенеш но. Сяме пыриз ини парламентлэн юртаз шаермылэн историеныз но туннэ нуналэныз тодматонъя урокъёс ортчытъян. Вылӥ дышетсконниосысь тужгес быгатӥсь но мерлыко уже пыриськись студентъёс понна Кун Кенешлэн нимысьтыз стипендиосыз чакламын. Ужа егитъёслэн парламентсы. Солэн кичӧлтэмезъя, кылем арын егитъёс понна нырысетӥез стратегической сессия ортчиз. Отын егитъёсын ужан политикаез азинтонъя Концепция дасямын вал.
Пермь улосвылысь пиналъёс люкаськемъёсты асьсэлэн «С Думой о детях» нимо ӵектосэнызы тодматӥзы. Со егитъёслы кивалтон ужен тодматскыны но отчы пыриськыны луонлык сётэ. Проектлэн кичӧлтӥсез – Кун Думаысь депутат Игорь Сапко. Дышетон но егитъёсын ужан удысысь туала ӧръёс сярысь вераз Кун Думаысь депутат Алексей Загребин. Солэн кылъёсызъя, туала вакыт кулэ каре выль ужан амалъёсты но выль быгатонлыкъёсты. Соин ик дышетон удысын воштӥськонъёс кулэ. Со экономикалы но мерлык удыслы вылӥ тодон-валанэн, выль сямен малпаськыны но ужаны быгатӥсь ӧнерчиосты дасяны кулэ. Пумиськонэ пыриськисьёс пусйизы, улосъёслы та ласянь огкылысь ужано шуыса.

Возврат к списку