Версия для слабовидящих
Кун Кенешын Удмуртилэн 2019-тӥ арлы коньдэтэзъя калык кылзонъёс ортчизы

Кун Кенешын Удмуртилэн 2019-тӥ арлы коньдэтэзъя калык кылзонъёс ортчизы

13.11.2018
Кун Кенешын Удмуртилэн 2019-тӥ арлы коньдэтэзъя калык кылзонъёс ортчизы
13-тӥ шуркынмонэ Удмуртиысь Кун Кенешлэн юртаз 2019-тӥ арлы элькун коньдэт сярысь катӵектосъя калык кылзонъёс ортчизы. Ужрадэ улосвыл парламентысь депутатъёс, кивалтэтлэн ёзчиосыз, профсоюзъёслэн, мер огазеяськонъёслэн ыстэм муртъёссы пыриськизы. Кенешон элькун парламентлэн Тӧроезлэн нырысетӥ воштӥсез Владимир Невоструев кивалтэм улсын ортчиз. Удмуртиысь коньдон ужпумъёсъя министр Станислав Еводокимов элькун коньдэтлэн ӵектосаз пыртэм валтӥсь лыдпусъёсын тодматӥз. Со пусйиз, ужкагазэз кылдытыку валтӥсь ужпумъёс луизы вань мерлыко оскытэтъёсты быдэстон, мерлык но экономика ужпумъёсты сэрттон-пертчон, улосвыллэсь кун пунэмзэ кулэстон. Катӵектосъя 2019-тӥ арын элькун коньдэтлэн табыш люкетэз 65 миллиард 379 миллион манет луоз, со пӧлысь 54 миллион манетлэсь (83 процентэз) уноез улосвылын люкам уксё. Эшшо 11 миллиард 176 миллион манет федерал коньдэтысь дотациос, субсидиос но субвенциос сямен вуоз шуыса чакламын. Со дыре ик министр пусйиз, Россилэсь коньдон ужпумъёсъя валтӥсь ужкагаззэ эскеремъя федерал бюджетысь улосвыллы висъяно уксёлэн быдӟалаез воштӥськоз. "Коньдэтэз кыкетӥ лыдӟемен эскеронлы лыдпусъёс будозы. Со 2019-тӥ арлы федерал коньдэтэз кыкетӥ лыдӟемен юнматэм бере луоз. Дотациосъя ми ватсаса 3 миллиард 365 миллион манет басьтомы, субсидиосъя – 2 миллиард 860 миллион но мукет трансфертъёсъя миллиард но ӝыны манет пала. Оглом вераса, берыктонтэм вылысь вуись коньдонлэн быдӟалаез кыкетӥ лыдӟемлы 11 миллиард 176 миллионысь 18 миллиард 900 миллион манетозь вуоз", - шуиз Станислав Евдокимов, Удмуртиысь коньдон ужпумъёсъя министр. Солэн кылъёсызъя, сыӵе бадӟым ватсэт федерал ёзъёс Удмуртилэсь коньдэтъя политиказэ умоен лыдъяло шуыса возьматэ. Федерал коньдэтэн ужез ар ӵоже азьланьтозы, пусйиз министр. Улосвыл коньдэтлэн уже кутоно люкетэз 64 миллиард 431 миллион манет тыр чакламын, соос 30 кун программаосъя люкылэмын. Со пӧлысь 45 миллиард манетлэсь уноез мерлыко удысъёслы мынозы, отысь 32 миллиардэз – коньдэт чотын ужасьёслы уждун тырыны. «Дышетонэз азинтон» кун программае быдэстыны 21 миллиард 274 миллион манет чакламын. Отын выль ӧр пыртэмын – элькунысь каръёсын нырысетӥ куинь арзэ ужась егит дышетӥсьёслы юрттэт. Тазалыкез утён удыслы 9 миллиард 958 миллион манет чакламын, мерлыко юрттэт сётонлы – 8 миллиард 844 миллион, «Удмуртиысь лулчеберет» кун программалы – 898 миллион манет пала, физкультура, спорт но егитъёсын ужан политикалы – 582 миллион манет котыр. Экономикаез азинтон ужпумъёслы 11 миллиард 261 миллион манет пусъемын. Валтӥсь удысъёс пӧлын – гурт возёсэз, транспорт сӧзнэтэз, мерлыко юртъёс пуктонэз, нюлэс возёсэз азинтон. Удмуртиысь Кун Кенешлэн тороезлэн нырысетӥ воштӥсез Владимир Невоструевлэн кылъёсызъя, оглом коньдэт урод ӧвӧл. "Оглом туннэ умой коньдэтэз адӟиськомы, табышез 64 миллиард, федерал коньдэтэз кыкетӥ лыдӟемен эскерем бере со борды эшшо 7 миллиард манет котыр ватсаськоз. Со милем вань мерлыко ужпумъёсты быдэстыны луонлык сётоз", - пусйиз Владимир Невоструев. Элькунлэн 2019-тӥ арлы коньдэтэз сярысь катӵектосэз Кун Кенешысь депутатъёс нырысетӥ лыдӟемен 27-тӥ шуркынмонэ эскерозы. Кыкетӥ лыдӟемен – толсуре.

Возврат к списку