Версия для слабовидящих
Удмуртилэсь кунлыксэ кылдытон бордын тыршем азьветлӥсез Иосиф Наговицынэз буре ваизы

Удмуртилэсь кунлыксэ кылдытон бордын тыршем азьветлӥсез Иосиф Наговицынэз буре ваизы

18.09.2018
Удмуртилэсь кунлыксэ кылдытон бордын тыршем азьветлӥсез Иосиф Наговицынэз буре ваизы
Туннэ, 18-тӥ куарусёнэ, Удмуртилэн шоркараз совето вакытысь кун ужасез, Удмуртилэсь кунлыксэ одӥгез кылдытӥсез, Вотской автономной улосвыллэсь нырысетӥ кивалтӥсьсэ Иосиф Наговицынэз буре вайизы. Удмурт азьветлӥсьлэн 130 ар тырмонэзлы сӥзем сӥё-дано ужрадэ Ижкарысь синпелетэз доры Иосиф Наговицынлэн внучатой племянницаез, тӧрлык но мерлык удысын ужасьёс, Йӧскалык музейысь но лыдӟетъюръёсысь ӧнерчиос, «Удмурт Кенеш» огазеяськонлэн ёзчиосыз но вань мылкыд карисьёс люкаськизы.
Удмуртиысь лулчеберетъя но туризмъя министр Владимир Соловьёв пусйиз, Удмуртилэн кунлыкезлы 100 ар тырмонэз пусъён азьын туж шонер кунлыкез кылдытӥсьёслы вазиськыны, одӥгез тужгес яркытэз соос пӧлысь – Иосиф Наговицын.
«Иосиф Наговицын вал, вань но луоз удмурт йӧслыкысь одӥгез тужгес яркыт адями, политик, кудӥз федерал тӧрлыке пыре вал. Со ужаз федерал тӧрлыкын. Солэн ужез Удмурт Элькунлэсь автономизэ кылдытон бордын туж бадӟым. Туннэ ми тау кариськом со адямиослы, кин асьме Удмурт Элькунэз кылдытӥз», - шуиз Удмуртиысь лулчеберетъя но туризмъя министр Владимир Соловьёв.
Элькунысь Кун Кенешлэн депутатэз, «Удмурт Кенешлэн» тӧроез Татьяна Ишматова тодэ вайытӥз, 2018-тӥ ар удмурт калыкен герӟаськем котырес лыдпусъёсын узыр шуыса. Туэ ми Кузебай Гердлы но Ашальчи Окилы 120 ар тырмонзэс пусйим, Алабгоын удмуртъёслэн нырысетӥ люкаськемзылы 100 ар тырмонлы сӥзем конференция ортчиз. Нош туннэ, 18-тӥ куарусёнэ, удмурт калыклэн эшшо одӥгез дано пиезлэн Иосиф Наговицынлэн вордскем дырысеныз 130 ар тырмиз.
«Адями, кудӥз улонэзлэн берпуметӥ нуналозяз аслэсьтыз осконъёсызлэсь ӧз куштӥськы, кудӥз вордскем шаерезлэсь кыдёкын вал ке но, берытскиз но удмурт калыклэн историяз, удмурт кунлыклэн историяз бадӟым, мур пытьы кельтӥз», - пусйиз Татьяна Ишматова.
Иосиф Наговицынлэн внучатой племянницаез, истори тодосъя кандидат Валентина Хазиахметова верамъя, туннэ та ужрадэ люкаськем калык солэн матысь эшъёсыз, Нош ӵыжы-выжыез сярысь тодэ ваён асьме нылпиослэн но сюлэмазы луыны кулэ. Озьы ик тодосчи пусйиз, Иосиф Наговицынлэн кун кивалтон но мерлык удысъя публицистика ужъёсыз туала нуналлы но тупало.
«Со 49 ар гинэ улӥз. Та дыр ӵоже кун лэсьтӥськон но калыкез мерлыко утён удысэн герӟаськем 500-лэсь ятыр ужъёс кылдытӥз. 130 ар тырмонэзлы солэн произведениосыныз 2 томъем бичет кылдытэмын, кудзэ луэ лыдӟыны, эскерыны но та адями сярысь тросгес тодыны. Мон шуысал, со кун кивалтӥсьлэн но мерлык удысын кивалтӥсьлэн дорожной картаез», - Валентина Хазиахметова, Иосиф Наговицынлэн внучатой племянницаез.
Ватсалом, Иосиф Наговицынлэн котырес лыдпусэзлы сӥзем ужрад политиклэн вордскем палъёсаз, Глаз ёросысь Октябрьской гуртын 14-тӥ куарусёнэ ортчиз. Озьы ик 2018-тӥ арысен Глаз ёросын Иосиф Наговицын нимо премия юнматэмын.
Ивор дасямын "Удмуртия" ивортодэтъя агентство юрттэмъя.

Возврат к списку