Ижкарын усьтӥськиз WorldSkills чемпионатлэн элькун этапез

Ижкарын сӥё-дано усьтӥськиз WorldSkills чемпионатлэн элькун этапез. ССУЗъёсысь егитъёс 4 нунал куспын, 1-тӥ южтолэзьысен 4-тӥ южтолэзёзь, ужаны быгатэмзэс возьмато. Асьме дорын таӵе вожвылъяськон 3-тӥ арзэ ортче ни.
Туэ ссузъёсысь студентъёс 26 удысъёсъя быгатонлыксэс адӟыто. Ӵошатсконъёс ортчо Ижысь, Глазовысь, Воткинскысь, Можагаысь, Уваысь техникумъёсын. Соослэсь ужаны быгатэмзэс эскеро Россиысь но Удмуртиысь 160-лэсь уно экспертъёс. Тужгес трос куриськонъёс вуэмын гурт удысъя машинаосты тупатъян, кирпичлэсь лэсьтӥськон, сваркаен ужан удысъёсъя. Нырысьсэ вожвылъяськон ортче экскурсиос радъясьёс пӧлын.
Ужрадэз усьтонэ пыриськиз улосвыл парламентысь тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез Татьяна Ишматова. «Асьмеос ваньмы тодӥськом веранэз «Инты адямиез уг чеберматы, адями интыез чебертэ». Мон сӥзисько тӥледлы асьтэлэсь быръем уждэс яратыны но быгатыса сое ужаны», - шуиз депутат.
«Туэ чемпионатэ, кылем арын сярысь, тросгес егитъёс пырисько — 234 мурт. Кылдӥз выль удыс — экскурсиос ортчытон. Малпасько, со туала улонлэн кулэлыкез. Угось Удмуртиын туризмез азинтыны выриськом. Чемпионатлэн валтӥсь ужпумез — ужась адямисолэсь данзэ будэтыны, асьме егитъёслэсь быгатонлыксэс дуннеын пуктэм куронъёслы тупамон карыны», - вераз дышетонъя но наукая министр Светлана Болотникова.