Версия для слабовидящих
Элькунлэн туэ арлы бюджетаз ватсанъёс пыртонэз эскеризы Кун Кенешлэн сессияз

Элькунлэн туэ арлы бюджетаз ватсанъёс пыртонэз эскеризы Кун Кенешлэн сессияз

28.02.2018
27-тӥ тулыспалэ Алексей Прасолов кивалтэм улсын Кун Кенешлэн сессиез ортчиз. Депутатъёс оглом 25 ужпум эскеризы. Валтӥсез – элькунлэн туэ арлы бюджетаз ватсанъёс пыртон.
Удмуртилэн 2018-тӥ арлы бюджетэз сярысь катэ воштонъёсын парламентариосты тодматӥз коньдон ужпумъёсъя министр Станислав Евдокимов. Солэн кылъёсызъя, бюджетлэн доход люкетэз 3 миллиард 495 миллион 759 сюрс манетлы будӥз. Бадӟым люкетэз – федерал бюджетысь ватсаса вуэм коньдон но 2017-тӥ арлэсь кылем целевой уксё. Со сяна – огазеяськонъёслэн прибыльзылы выт, кудӟытись суретъёслы акцизъёс, капчиятэм системая выт бичан. Федерал бюджетысь ватсаса 1 миллиард 159 миллион манетлэсь трос вуиз на. Кытчы кошкоз коньдон? Нырысь ик, 590 миллион манет ватсалозы семьяослы но нылпиослы юрттон понна. Ватсаса коньдон висъяськоз тазалыкез утён удысэ – секыт висисьёслы эмъюмъёс басьтонлы, нырысетӥ пинал вордӥсь семьяослы пособиос тыронлы, сюрес лэсьтонэ но трос мукет. Озьы, вань тупатонъёсты лыдэ басьтыса, республикалэн туэлы бюджетэзлэн доход люкетэз 68 миллиард 222 миллион манет луиз, расход люкетэз – 67 миллиард 940 миллион манет. Профицит – 282 миллион манет.

Возврат к списку