Алексей Прасолов: Элькун парламентлэн прокуратураен ӵошен ужамез юрттэ кутэм законъёслэсь ӟечлыксэс будэтыны
31.01.2018
Кун Кенешлэн Тӧроез Алексей Прасолов Удмурт Элькунысь прокуратуралэн коллегиезлэн паськытатэм кенешоназ пыриськиз. Отын 2017-тӥ арлы йылпумъянъёс лэсьтӥзы.
«Кун Кенешысь депутатъёсты но прокуратураын ужасьёсты огазея одӥг уж – катрадлыкез азинтон. Ӵошен ужан юрттэ кутэм катъёслэсь ӟечлыксэс будэтыны», - вераз элькун парламентлэн Тӧроез люкаськемъёс азьын. Солэн кылъёсызъя, прокуратураын ужасьёс Кун Кенешлэн сессиосаз, Президиумлэн кенешонъёсаз котьку пырисько. Со сяна, котырес ӝӧкъёсын, совещаниосын, мукет пӧртэм ужрадъёсын ужаны котьку соглаш луо. Алексей Прасолов прокуратураын ужасьёслы сюлмысь тыршемзы понна тау кылъёссэ вераз, азинсконъёс сӥзиз.