Туннэ Ижкарын Калыкъёслэн эшъяськон юртазы удмурт егитъёслэн «Удмурт-а мон?» улосвылкуспо форумзы усьтӥськиз. Ужрадэ пыриськизы Кун Кенеш Тӧролэн воштӥсез, тазалыкез утёнъя, демографияя но семья политикая ялан ужась ӧрилэн кивалтӥсез
Надежда Михайлова, наукая, дышетонъя, лулчеберетъя, нациосын но егитъёсын ужан политикая но спортъя ялан ужась ӧрилэн кивалтӥсез
Татьяна Ишматова, Кун Думалэн депутатэз Алексей Загребин, Правительстволэн Тӧроезлэн воштӥсез Александр Свинин, министерствоослэн, школаослэн кивалтӥсьёссы. Татьяна Ишматова ужрадлэсь историзэ вераз. Кылем арын форум ортчиз дискуссионной площадка кадь, кытын егитъёс быгатӥзы министерствоослэн кивалтӥсьёсынызы, элькун парламентлэн, кар Думалэн депутатъёсынызы вераськыны. Таиз форум юрттоз удмурт пиналъёслы асьсэлэсь проектъёссэс быдэсъяны, кудъёсыз сӥземын удмурт лулчеберетэз азинтонлы, пичи гуртъёсты утёнлы. Ужрадэ
Удмуртиысь, Башкортостанысь, Татарстанысь но Киров улосвылысь 150 пала адямиос пыриськизы. Соос пӧлын вылӥ но шоръёзо ӧнер дышетсконниосысь студентъёс, егитъёсын но коммерци луисьтэм огазеяськонъёсын ужась ӧнерчиос, лулчеберетъя но дышетонъя ужъюртъёсын тыршисьёс, журналистъёс, ужбергатӥсьёс.
