Туннэ Ижкарысь Историяя, кылъя но литературая удмурт институтын истори тодосъя докторлэн, профессорлэн Кузьма Куликовлэн 80 арес тырмемезлы сӥзем сӥё-дано ужрад ортчиз. Тодмо удмурт тодосчиез ӟечкылаз наукая, дышетонъя, культурая, нациосын но егитъёсын ужан политикая но спортъя ялан ужась ӧриен кивалтӥсь
Татьяна Ишматова. Солэн кылъёсызъя, Кузьма Куликов наукаез азинтон сяна, бадӟым саклык висъяз Удмуртилэн общественно-политической улонэзлы. Депутат сӥзиз профессорлы юн тазалык но шудбур. Со сяна, Кун Кенешлэсь Тӧроезлэсь
Алексей Прасоловлэсь ӟечкылан адрес сётӥз. Удмуртиысь лулчеберетъя но туризмъя министр Владимир Соловьёв Кузьма Куликовлэсь ужъёссэ вераса, удмурт йӧскалык лулчеберетэз азинтонъя кык ӵектосъёсты пусйиз: Историяя но лулчеберетъя «Иднакар» музей-заповедникез но чеберлыко киужъёсъя центръёсты. Министрлэн кылъёсызъя, соос Удмуртиез быдэс дуннелы тодмо каро.
