Кун Кенешлэн сессияз депутатъёс элькун кивалтэтлэн Тӧроезлэн воштӥсьёсызлэсь кандидатураоссэс соглаштӥзы. Соосты ӵектӥз улосвыл Тӧро Александр Бречалов. Правительстволэн Тӧроезлы нырысетӥ воштӥсе дэмламын Александр Свинин. Депутатъёс азьын вераськоназ со улосвыл Тӧроен пуктэм бадӟым ужпумез — вытъёслэсь но мукет тыриськонъёслэсь табышез вить ар ӵоже кык поллы будэтонэз пусйиз. Александр Свининлэн кандидатураезлы 45 депутатъёс дурбасьтӥзы, кыкез пумит луизы. Кивалтэтлэн Тӧроезлэн воштӥсез — улосвыл Тӧролэн Росси азьмурт бордын ялан ужась ыстэм муртэз луоз Михаил Хомич. Солэн кандидатураез понна 44 депутатъёс куаразэс сётӥзы, куинез пумит луизы. Вице-премьерлэн интыужаз озьы ик соглаштэмын «Фармация» но «Аптеки Удмуртии» кун предприятиослэн кивалтӥсьсы Анастасия Муталенко, со понна 40 депутат куара сётӥз, сизьымез пумит луиз, но Анатолий Строков, со понна 44 парламентариос луизы, куинез пумит куара сётӥзы.
