Алексей Прасоловез Кун Кенешлэн Тӧроезлы бырйизы
26.09.2017
Туннэ Кун Кенешлэн куатетӥ отчамезлэн нырысетӥ сессиезлэн кыкетӥ заседаниез усьтӥськиз. Одигез валтӥсь юанъёс пӧлын - Кун Кенешлы выль кивалтӥсь быръён. «Единая Россия» ӵектӥз аслэсьтыз адямизэ Алексей Прасоловез.
Кызьы вераз Анатолий Наумов, Кун Кенешысь «Единая Россия» фракцилэн кивалтӥсез, Алексей Прасолов Кун Кенешын витетӥ ӧтчамзэ ужа ини. Элькун парламентын сыӵе кема ужамез возьматэ Удмуртиысь калык сое яратэ но гажа шуыса.
Кун Кенешлэн 5-тӥ ӧтчамезлэн Тӧроез Владимир Невоструев но Кун Кенешлэн депутатэз, Нырысетӥ элькун больницалэн валтӥсь врачез Надежда Михайлова Алексей Прасоловлэсь лидер луэмзэ но умой кивалтыны быгатонлыксэ пусйизы.
Озьыен, Алексей Прасолов понна, лушкем куара сётыса, дурбасьтӥзы 55 депутат, 4-эз пумит луиз. Сое Кун Кенешлы кивалтӥсе бырйизы.