Версия для слабовидящих
Владимир Невоструев гурт возёсъя но сиён-юонъя Министерстволэн коллегияз пыриськиз

Владимир Невоструев гурт возёсъя но сиён-юонъя Министерстволэн коллегияз пыриськиз

03.08.2017

Кун Кенешлэн Тӧроез Владимир Невоструев но агропром огъетъя, музъем кусыпъёсъя, музъем узырлыкез уже кутонъя но инкуазез утёнъя ялан ужась ӧрилэн кивалтӥсез Владимир Варламов гурт возёсъя но сиён-юонъя Министерстволэн коллегиезлэн кенешоназ пыриськизы. Совещание, кытчы озьы ик пыриськиз Удмуртилэн Тӧроезлэсь ужзэ огдырлы быдэсъясь Александр Бречалов, ортчиз Дэри черкогуртын.
2017-тӥ арлэн нырысетӥ палараз агропром огъетлэн ужамезлы йылпумъянъёс сярысь коллегиын элькунысь гурт возёсъя но сиён-юонъя министрлэсь ужзэ быдэсъясь Александр Прохоров вераськиз.
Солэн кылъёсызъя, гурт возёсын ваньбур поттон элькунын будэ, нош Россиысь тросаз улосвылъёсын со кулэсмиз. Йӧл 253 сюрс 800 тонна кыскемын. Но гужем трос зоремен но пудо сиён тырмыт луымтэен со синӥз. Нырысетӥ кварталын ватсэт 7,1 процент вал ке, ӝыны аръя 4,7 луиз. Ар ӵоже 5,5 процентозь будэтыны чакламын, оглом 670 сюрс тонна йӧл кыскыны ужпум пуктэмын. Одӥг скаллэсь 3 сюрс килограммлэсь кӧня ке тросгес кыскемын, арскын 6 сюрс килограмм луыны кулэ.
Куазь умой луыса, пудо сиён дасянын югдур но тупатскиз. 2-тӥ гудырикошконлы одӥг йыр пудолы 17,1 центнерен сиён дасямын (кылем арын та дырлы ик 19,1 центнер вал). Тодосчиослэн чакламзыя, ӧжытсэ 15 центнерен сиён луыны кулэ, соин ик музъем укыр мускыт луэмен сэрен 17-тӥ пӧсьтолэзе ялэм шуэрес югдурез палэнтыны яра ни. Ужпум пуктэмын пудо йырлы быдэ ӧжытсэ 30 центр сиён дасяны.
2016-тӥ арын элькунын 49 гидъёсты лэсьтыны но выльдыны 1,8 миллиард манет кутэмын. 2017-тӥ арлэн нырысетӥ палараз 22 выль гидъёс пуктӥзы но тямыссэ выльдӥзы. Со пудолэсь лыдзэ 2 сюрс 50 йырлы будэтыны луонлык сётӥз, ар пумозь эшшо 2 сюрс 200 йыр ватсаны чакламын. 117 сюрс скалъёс пӧлысь али 33 сюрсэз ӟеч выжыысь. Таяз арын эшшо 50-лэсь трос гидъёс пуктӥсько на. Йӧл кысконэз будэтон ужпумез нокин уг палэнты — Удмуртиысь йӧллэсь сиён-юонъёс поттӥсь предприятиослэн кужымзы али 60 процентлы гинэ кутӥське, вераз удысэтлэн кивалтӥсез.
Удмуртилэн Тӧроезлэсь ужзэ огдырлы быдэсъясь Александр Бречалов улосвылысь аграрийёсты агропром огъетэз азинтонъя огъя учкетэз дасяны ӵектӥз. Солэн верамезъя, со понна гурт удысъя нимаз ужрад ортчытыны яра, со Удмуртилэн Инвестици луонлыкъёсызъя картаеныз алигес тодматон выллем луыны быгатоз. Сыӵе форуме удысэз азинтонъя вань федерал институтъёсты, Гурт возёсъя министерствоысь, бадӟым бизнесысь ыстэм муртъёсты ӧтьыны, москвичьёслы кун юрттэтъя федерал программаосъя ӵектонъёс сётыны луэ, али куд-ог ужкагазъёслэн куронъёссы улосвыллэн аспӧртэмлыкъёсызлы уг тупало.


Возврат к списку