Владимир Невоструев: матысь аръёсы элькунысь каръёсысь но ёрос центръёсысь вань азбаръёсты но паркъёсты умоятыны кулэ

Матысь вить аръёсы Ижкарлэн, Удмуртиысь пичи каръёслэн но ёрос центръёслэн вань интывылъёссы умоятэмын луыны кулэ. «Единая Россия» партилэн 24-тӥ пӧсьтолэзе Краснодарын ортчем «Городская среда» форумаз со сярысь журналистъёслы вераз Удмуртиысь Кун Кенешлэн Тӧроез Владимир Невоструев.
«Ӵектосъёс одно ик азьланьтэмын луозы. Валтӥсез татын, ваньмыз мед дышетскозы. Муниципал кылдытэтъёс гинэ медаз пусъе, мар татын туннэ лэсьтӥськомы, татын ум лэсьтӥське. Со умой улыны малпась азбаръёслэн кичӧлтонзы луыны кулэ. Соос ӵектонъёс сётыны, куриськон дасяны кулэ, собере ини асьме каръёсты, асьме азбаръёсты азинтонъя программаосты кылдытыны. Со чаклам радлыкъя, вить ар ӵоже луыны кулэ», — вераз со.
Владимир Невоструев пусйиз, Россиысь вань улосвылъёслэн пыриськеменызы таӵе форумез ортчытон туж дыраз шуыса. Солэн кылъёсызъя, партилэн благоустройствоя ӵектосъёсыз кунмуртъёслэсь саклыксэс кыскизы, соосты быдэсъянэ калык мыло-кыдо пыриське, нош нырысетӥ йылпумъянъёс возьмато, та ласянь улосвылмы шонер сюрес бырйиз шуыса.
Тодэ вайытом, «Единая Россия» партилэн «Городская среда» форумез кар интывылъёсты умоятонъя ӵектосъёсты быдэсъян ужпумъёслы сӥземын вал. 2017-тӥ арын Удмуртиын 30 каръёсын но ёросъёсын 312 азбаръёсты тупатъялозы. Элькунысь 9 муниципал кылдытэтъёсын мер вӧлметъёсты умоятыны чакламын.